Vawiin khan Empowered Committee on Investment te chu an Chairman Pu Lalduhoma, Chief Minister hovin CM Conference Hall-ah an thukhawm a. An lo thutkhawm tawh thinna thu, Mizorama sawhthing processing unit din duh, dilna thehlut zinga company palite dilna chu an pawm fel.
Heng company an pawm te hi:
1. Sjar Consulting Private Limited, Noida, UP. Anmahni sum Rs 38 crore thleng invest theia insawi, mi 200 aia tam chhawr thei tura inngai te an ni.
2. Opickpure Organic Pvt, ltd. Kangra, Himachal Pradesh. Anmahni sum Rs. 2.5 crore senga bul tan theia insawi, hnathawktu mi 50 vel thlenga chhawr thei tura inngai an ni.
3. AV Biotech, Bikaner, Rajasthan. Rs. 13. 95 crore vel invest inhuam, mi 100 vel thleng chhawr thei tura inngai an ni.
4. Lushai Organic, Mizoram. Rs. 1 crore vel invest inhuam, mi 20 vel chhawr thei tura inngai an ni.
Heng company ten inbun tur chungchang tih fel kim a la ni lo deuh va, rang zawka thutlukna siam a nih theih nan Special Investment Committee din a ni a, anni hian company te be chungin an inbunna tur hmun te, draft MoU te, company ten sawrkara mamawh an neih ram, power leh tui chungchang thlengin an lo bawhzui ang.
Meetingah hian Pu TBC Lalvenchhunga leh Dr. KC Lalmalsawmzauva, Adviser to CM te, Pu Khili Ram Meena, Chief Secretary, Pu Vanlaldina Fanai, Commissioner & Secretary to CM leh member dangte an kal tha hle.
