Mizoram Legislative Assembly member, Pu Lalrintluanga Sailo National Core Committee chuan kum 65 mi niin July 21, 2025 (Thawhtanni) zan dar 9 vel khan Max Hospital, New Delhi-ah khawvel a chhuahsan ta. “MNF chuan kan uiin kan sun a, MNF ban pui rinawm chu a tliak ta a ni,” tiin MNF party chuan thu chhuah a siam.
Pu Lalrintluanga Sailo hian kum 1976 khan, kum 16 chauh niin ‘Pathian leh kan Ram tan’ tiin, India lak atanga zalenna sualtu MNF zawmin hnam sipaiah a tang a. A tawp thlenga awmin remna ziah khan a lo haw a, 2nd lieutenant a kai hman a. Overground politics-ah MNF tan thahnem ngai taka thawkin nihna hrang hrang a chelh chho a, tunah hian National Core Committee Member a ni mek a ni.
Kum 2018 inthlanpuiah khan MNF Party ticket-in Dampa bialah MLA atan hneh taka thlan tlin a ni a. Kum 2023 khan he bial atang bawk hian hneh takin thlan tlin nawn leh a ni.
MNF chuan, “Party tana rinawm, ram leh hnam tana thahnem ngai, a bial tana theih tawp chhuah mektu, hun lo taka kan chan hi MNF chuan a ui tak zet a. Bible nema kum 16 mi lek a nih laia ram leh hnam tana a thisen far tawp thlenga inhlan Pu Lalrintluanga Sailo chu a intiam ang ngeiin a thih ni thlengin ram leh hnam tan a nung ta a ni. A kalsan tak a nupui Pi Lalbiakthuami leh a tu leh fate Pathianin awmpui mawlh rawh se,” an ti bawk.
Pu Lalrintluanga Sailo hian a nupui leh a fate panga a kalsan a, vawiin hian Lengpuiah a ruang hi rawn thlenpui a nih hnuah zanin (July ni 22,2025) hian tlaivarpui a ni ang a, naktukah Luangmual Thlanmualah vuiliam a ni ang.
