Vawiin khan Mizoram chak lakluhna kawngpui pawimawh, Kawnpui leh Khamrang inkar dinhmun chu Adviser to CM (Finance & Technical) Pu TBC Lalvenchhunga hovin Mizoram PWD hotute leh NHIDCL hotute chuan a hmunah an en a; a thawmthat hna thawhlai mek chu chak lehzuala kalpui nise tih a ni.
Adviser to CM hi NHIDCL atangin Executive Director thar Adelbert Susngi leh Technical Director Amarender Kumar ten an tawiawm a, Mizoram PWD atangin CE Highway Robin Lalrinawma leh SE Highway Circle I Eddie Zothansanga ten tawiawmin, kawng chhia thawmthat hna thawh mekah chak taka hmalakna kalpui mek a ni a, Khawl leh hmanrua leh hnathawktute pawh a theih anga tam in dah tum a ni.
Adviser to CM chuan NHIDCL hotute chu darker 6 danah an hmalakna report pe turin a ti a, harsatna an neih te pawh Sawrkar thuneitute hnena thlen hreh lo tur leh rang taka hmalakpui nghal zel an nih tur thu a sawi bawk.
Kawnpui leh Khamrang inkar kawngpui chhia thawm that hna thawh mekah hian NHIDCL contractor chuan Excavator 4 (pali) leh JCB 2 (pahnih) bakah Road roller pakhat leh Motor Grader pakhat an inchhawp a, nizan atang khan Mizoram PWD chuan zan lama lirthei tang buaipui turin JCB 3 (pathum) an chhawp bawk.
Helai kawngpui siam mek a nih avang hian chhun lamah Aizawl lam pan lirthei te chu Kawnpui daiah leh Kawnpui lam pan te chu Khamrang-ah dan an ni a, zan lamah chhuah an ni thin.
Adviser to CM tawiawm hian PWD leh NHIDCL hotute bakah, Kolasib District Bawrhsap leh Addl SP te an kal bawk.
