Vawiin July 26, 2025 Zirtawp hian Congress Bhavan-ah MPCC Political session neih a ni a. He hunah hian Pu Lalbiakzama, Secretary, MPCC chuan thu a sawi.
He huna thu sawitu Pu Lalbiakzama, General Secretary, MPCC chuan, “Ramin hma a sawn dawn chuan a pawimawh hmasa ber chu ram hruaitu tha a ni. Hruaitu tha, tih tak taka ram hruai hna thawktu chuan ram hmasawnna a thlen thin. Hruaitu tha kan hriat theihna tur chu thusawi thiamah ni lovin, tih tawhah te teh zawk tur a ni. Rahchhuah atanga inteh hi a lo tha khawp mai.
“Kan President hi tum khat chu a inah kan thlah a, chumi tum chuan a sawi ka hriat reng chu, ‘Kei chu tih tak taka ram rawngbawlna kan kalpui thei dawn lo a nih chuan lal hi ka chak reng reng lo,’ tiin min hrilh a, chutianga ti tak tak mi, hruaitu kan nei hi kan vannei a, lawmawm ka ti hle.
“Ring lo mi kan tih vai zingah khuan hruaitu tha an lo chhuak fo mai. Ring lo mi mah ni se, dik leh rinawm taka ram an kaihhruai thin avangin ram pawhin hma a sawn a, an party ni lo te pawhin an zahin an ngaisang thin. Chutiang mi chu Mizo mipuite pawh hian thlanchhuah i tum ve tawh ang u.
“Democracy ram kan inti a, ka hlauhthawn thin chu mi thenkhat tawngkam thiam leh mi hneh thei ten ram hruaina hna an chelh thin hi a ni. Mizoram kum 20 chhung rambuai kan nih chhan chu mi thenkhat tawngkam thiam leh mi hneh thei te vang a ni. An tawngkam thiamna leh mi hneh theihna hmangin thalaite an hneh a, chu chuan tah leh ha thialna ramah min hruai lut a ni. Ram buai tawh loh hnu kum 40 ah pawh thil theih loh tiam a, thalaite hip tura thil tha tin reng tiam tuten thuneihna an la chang fo mai. Tumah mifel famkim kan awm lo. Hun kal tawhah leh tun hunah pawh ram hruainaah tunge ti tak tak tih hi mipuite pawhin ram hruaitu tur kan thlan dawnin buk nan hmang tawh se ka ti a ni.” a ti.
Friday Political Session hi Pu C. Lalringliana, Secy. MPCC chuan a kaihruai a. Pu C. Lalmalsawma, President, Aizawl West-1 Block-1 leh R. Lalnunringa, Vice-President, Aizawl East-1, Block-II ten report an pe bawk.
