July 25, 2024 Zirtawpni zanah khan Dr. Lalmalsawma Nghaka, D-3 Business Enterprise neitu chuan ‘Thuruk Thuhruk’ tih filml chu Vanapa Hall-ah mi zawng zawng en theih turin a tlangzarh. He film hi Leikapui Studios App-ah leh leikapuistudios.com-ah te en theih nghalin a awm a ni.
He film hi Hebron Productions kutchhuak a ni a, Director – Remruattluanga Pautu niin, Sangsangi Khawlhring chu Script Writer a ni a.
Tlangzarhtu Dr. Lalmalsawma Nghaka chuan, “Film pakhat siam tur hian mi tam tak talent hrang hrang nei, a thawnthu ziaktu, a chang chhuaktu te leh videography leh audiography thiam bik te leh support crew tam tak an awm a ngai a.
“Mizo film industry-in hma a sawn chhoh zel hi a pawimawh hle a. Mizo tawng humhim nan leh kan hnam zia humhalh nan te thil tangkai tak a ni a, nakina tuchhuak lo awm zel tur ten pi leh pu, nu leh pa te nun dan phung, hnam zia rang leh tawng kauchheh te an zir let theihna hnar pawimawh tak a ni dawn a. Kan thalai rualten film industry an kalpui chho thei zel hi Mizo mipuite pawhin hlutpui nachang kan hriat chhoh zel a tul tak zet zet a ni,” tiin a sawi.
He film hmuhnawm taka a changtute hi tun laia Mizo Film industry-a lemchang thiam lar ber berte niin, Duhawma Hmar, Rody, Jasmine Chinzah, Aarona, Chhanhima leh midangte eng emaw zatte an inlan a ni.
He tlangzarh inkhawmah hian Mizo thalai eng emaw zat an kal a, hun hlimawm tak an hmangho a ni.
