MPCC chuan Zirtawpnia Congress Bhavan, Aizawla Political session an neihnaah PC Laltlansanga MPCC General Secretary chuan thu a sawi a.
Pu Laltlansanga chuan “Congress sorkar kum 10 hnuhnung zawk Pu Lal Thanzara PWD minister a nih lai tawplam khan ruahtui a tam em em a. Kum thum chhung kha ruahtui ML sanghnih chuang a zawn zatin a tla a ni. Kum 2015 ah ruahtui 2412.3 ML, kum 2016 ah 2161.1 ML leh kum 2017 ah phei chuan 2686.7 ML laia tam a tla a. Hemi kum phei chu State kan nih hnua ruahtui kan dawn tam ber kum a ni. MNF sorkar hmasa kum 10 chhung khan ruahtui 2000 ML chuang a tlak kum thum chauh a awm a ni” a ti.
Pc Tlansanga chuan, “Khati taka a zawna kum 3 chhung ruahtui a tam avang khan kawng siamna hun ṭha a tlem a, kawngpui siamna tur bik liau liaua kum 2018 PWD budget Roads & Highway head-ah Rs 20632.74 lakhs Congress sorkar khan dahin a tlak san a ni.
“Congress sorkarlai khan ruahtui a tam mai bakah Aizawl to Champhai, Aizawl to Tuipang, Aizawl to Kanhmun te hi contractor ten hna an ṭan tawh a. Lei laih (formation cutting) avangin kawng a diak em em. Kha vang khan vawiina kawng ṭha tak kan neih takte hi khatihlai kha a diak vanglai a ni. Sorkar inthlahdah vanga kawng kha chhia a nilo a, kawng ṭha tur siam vang a ni” Pu Laltlansanga chuan a ti bawk.
“Vawiina Kawnpui leh Sairang inkar kawng NH-06 hi nikum 2024 fûr-ah pawh khan a chhe em em tawh a, motor tam tak an tlu ṭhin. Mizoram Comercial Vehicle neitute leh Driver ten nawrh an huaihawt a nih kha. Khami tum khan kan CM chuan Dt 16 Sept 2024 khan nawrh huaihawttu MCVU te kawmin an hnenah, ‘Hna kan ṭan nghal dawn a. Satguru te security deposit pawh kan laksak tawh’ tiin a lo hrilh a nih kha.
“Kum 2024 september aṭangin NH 06 km 118 kawnpui to km 133 New Khamrang inkar hi Mizoram sorkar PWD kutah a awm a. NHDCIL hian Mizoram sawrkar kut atangin kumin 2025 July ni 7 aṭang khan an la chhawng chauh a ni a, ṭhal khaw ṭha thla 9 chhung PWD kutah a awm. Chuvangin helai kawng chhiat avanga harsatna kan tawh mekte hi sorkar mawh liau liau a ni.
“Darlak leh Tuidam inkar kawng pawh khu a chhe em em a, a siam nan cheng nuaih 20 chauh an dah. ‘ZPM Chief Minister chu motor changkangah a chuang ve dawn lo’ titu CM motor nuaih 30 man aiin Mamit dist Darlak kawng siamna tur a tlem zawk a, Mamit District khuan kan CM motor thar man pawh an tluk lo a nih chu” Congress Gen. Secy Pu Laltlansanga chuan a ti.
“ZPM te hi an inzawrhna a sang a, mipuiin kan tehna pawh a sang. Tunah chuan kum khat leh a chanve chauh a la kal a. Sawisel nan a la hma deuh a. Chutihrualin sorkar kalta dangte chu an term tawplam MLA inthlan dawn kumah mipuiin an ning ṭhin, ZPM chu mipuiin an ning ṭan der tawh.
“Congress party in retheite chhanchhuah nan Nlup a pek tawhte an lungleng mek a, ZPM thlak turin mipui beisei Congress-ah a luangkhawm mek a ni” Pu PC Laltlansanga chuan a ti bawk.
