Vawiin khan AMC Ward 14 Corporator Pi Ramthanzauvi chuan a bial chhung Khatla South-a Primary School a tlawh a, zirna an kalpui dan te leh zirtirtu dinhmun bakah School building-te enin hmasawnna awm theih dan turte an sawiho a, mamawh an thlente pek a tiam.
Pi Ramthanzauvi, Corporator chuan, “Ka bial chhunga zirna In, a bikin sorkar zirna School-te hi ka vei em em a, tlawhchhuaha an dinhmun en leh mamawhte ngaihthlak ka duh thin. Vawiina hun remchang kan nei thei hi ka lawm a, zirna hi hmasawnna bulthum a nih avangin ram leh khawtlang, chhungtin kan tan tlan a ngai a ni. Tunlaiah English medium private school te chhungtinin kan bawh deuh vek tawh a, chutihlaiin tlema harsa zawkte luhna sorkar school hlamchhiah theih a ni lo. Vawiina sorkar hnathawk lian leh kan mithiam tak takte hi sorkar school chhuak deuh vek zawk an ni a, tunlaiah English medium school te a tam tawh avang leh mi nawlpuite luhna a nih tawh avangin sorkar school te pawh an tangin English medium te a el a, Khatla South Primary School pawh sorkar school zinga chhuanawm leh tan la ber zinga mi an nih avangin chhuanawm ka ti takzet a ni,” tiin mamawh an thlen Refrigerator pek a tiam a, inthlahrung lo tur leh School hmasawnna tura theihtawpa thawhho a duh thu a sawi.
Headmistress Lalnuntluangi Ralte chuan, “Khatla South Primary School-ah hian zirlai 44 (mipa 17 leh hmeichhia 27) an awm a, zirtirtu 7 in enkawlin zirlaite lehkha kan zirtir ngawr ngawr piah lamah enkawl ngai leh zual naupang an nih avangin nitin school an rawn kalnaa kan lo enkawl danah tute fiah pawh kan ngam a, kan rawngbawlna a nih avangin phur takin kan thawk reng thei a ni,’ a ti ve bawk.
AMC Ward 14 Corporator Pi Ramthanzauvi hian Khatla South MUP hruaitute kawmna hun hmang zuiin an building tur sak bul tan mek puihna atan Rs.50,000/- a hlan bawk a ni.
