Zoram Medical College & Hospital (ZMC&H), Falkawn chuan 7th Founding Day lawmna hun vawiin khan an hmang a. Lalrinpuii, Hon’ble Minister, Health and Family Welfare Department chuan khuallian niin hun a hmanpui a, Dr. Lalthlengliani, Principal Director, H&FW chuan ni lawmna inkhawm hi a kaihruai a ni.
Minister chuan thingtlang mipuite thleng phak healthcare service a ngaih pawimawh thu sawiin mizo mipuite tana ZMC&H hlutzia a sawi a. Tun hnaiah hmasawnna tam tak hmuh a ni chu lawmawm a tih thu a sawi. A hun leh ngaihtuahna zawng zawng Hospital hmasawn nana a sen thin thu a sawiin India rama Institution tha ber ber atanga zir chhuak thawktu ZMC&H in kan nei chu lawmawm a tih thu sawi a, zirlaite tan pawh thil lawmawm tak a nih thu a sawiin Zirlaite chu Mizorama Cancer hluarna chhante leh natna dangte pawh zirchianga, tihtak zeta bei turin a fuih bawk. Vawiin vek khan MBBS Intern Hostel sak thar, khum 60 awmna Charles Robert Darwin Hostel tia vuah chu a hawng nghal a ni.
ZMC&H Founding Day lawmnaah hian ZMC&H Director, Dr. John Zohmingthanga hnen atangin Report ngaihthlak a ni a, din tan a nih atanga tun thlenga hmalak tawhnate a tar lang a; Er. C. Lalenkawla, Sr. Executive Engineer, Project Division-II, PWD hnen atangin Intern Hostel sak dan Technical Report ngaihthlak a ni bawk.
Tun dinhmunah ZMC &H-ah hian MBBS zirlal 394 awm mekin, Internship ti mek 98 an awm a, Batch hnih (2018 & 2019 Batch) atangin MBBS zir chhuak 189 awm tawhin MBBS zirlai atang hian National Level Essay Writing Competition on Family Adoption Programme-ah lawmman dawng pawh mi 2 an lo awm tawh a, National Level Quiz-ah te pawh lawmman an lo dawng tawh bawk a ni.
Tun hnaia ZMC &H hmasawnna langsar zualte:
– Thluak zai theihna Neurosurgery Unit leh Lung tha lo zai theihna Cardiothoracic & Vascular Surgery Unit (CTVS) din thar niin Doctor thiam takin an thuthchilh tawh a ni.
– PM Abhim Scheme hnuaiah 25 Crores sengin Critical Care Block sak mek a ni.
– Vawiina hawn thar Intern Hostel khum 60 awmna bakah hian mipa Hostel – 2 leh Hmeichhe Hostel – 3 a awm mek a, a vai hian zirlai 600 chuang awm theihna a ni.
– Hnathawktute awmna tur mi 120 awm theihna sak mek niin 70% sak zawh a ni tawh bawk.
– Tun dinhmunah Doctor 372 awm mekin heng zinga 80 te chuan damlo enkawl leh zirtir hna an thawk kawp a, mi 60 research lama inhmang bik an awm bawk.
– Nursing, Paramedical & Allied staff mi 450 awm mekin, Technical Staff 120 leh Research tilai mi 60 an awm mek bawk.
– Mizoram Universal Health Care Scheme (MUHCS) hnuaiah Medical Officer 2, Nursing Officer 54 leh Group D 13 lak thar an ni tawh bawk.
– MUHCS kalpui a nih hnuin khum 52 awmna Ward bakah Cabin 20 leh ICU 13 dah belh a ni tawh bawk a, tun dinhmunah avaiin khum 505 a awm mek a ni.
– Mizorama a hmasa ber atan Mizoram Health Systems Strengthening Project (MHSSP) hnuaiah Biopsy Compatible CT Scan bun tum mek a ni.
– National Institute for Locomotor Disabilities (NILD), Kolkata te, National Emergency Life Support (NELS) leh Jodhpur School of Public Health (JSPH) te nena thawhhona thuthlung siam mek a ni bawk.
Heng bakah hian hmasawnna neuh neuh eng emaw zat a awm tawh a, Laboratory te pawh thawmthat zel niin Viral Research and Diagnostic Laboratory (VRDL) Team, ZMC &H te chuan India rama diagnostic laboratory ti tha lawmman, “Excellence for best VRDL 2024 Award” an lo dawng tawh bawk a ni.
