Mizoram Business Co-ordination Committee (MBCC) dt 07.08.2025 a ṭhukhawm chuan thuchhuah siamin, Mizoram mipui ngai pawimawh turin Mizoram Chief Minister leh a thawhpuite ngenna a hnuai a mi ang hian an siam.
“Mizoram chak lak luhna kawngpui awmchhun hi km 120 vel chauh a ni chungin Lirthei tlan theih loh khawpa a chhia hi vanduaithlak kan ti hle a, tlawmngai pawl leh ram mipuiten aw kan chhuah chuah chuah tawh hnuah pawh Mizoram sorkarin midang mawhpuh kualin a la ngawihsan tlatte kha kan dem tak zet a ni.
“State ve meuhin a ram mipui chak lakluhna kawng awmchhunah mawhphurhna a lak duh tak loh avanga tlawmngai pawl pakhat PIL thehluh High Court in a lo ngaih thutak hnuah chauh sorkar a che chhuak hi mipui hmakhaw ngaih vang niin kan hre thei lo a. Mizorama Lirtheia sumdawng/eizawng pawl hrang hrang intelkhawmten tlan ngaihna thlawt awm lo khawpa kawng a chhiat avang leh kawngpui ṭha zawka siam a nih theih nan ni 04.08.2025 aṭanga ni 09.08.2025 chhung bungraw phur chi engmah tlan lo tura thutlukna an siam hi an dinhmun ngaihtuahin an lainatawm kan ti hle a. Loan rûl mekte tan leh driver leh handlemen-te hlawh pek reng ngai chunga hetianga kawngpui chhiat vanga hnathawk lo tura motor din a ngai hi pawi kan ti tak zet a; an hmalakna hian awmzia nei ngei se kan duh a, Mizoram sorkar pawhin theih tawp chhuah se kan duh a ni.
“Hetianga hmalakna hrang hrang a awm tak hnuah sorkar lai party Legislature meeting-in nitin kawngchhe siam en tura MLA leh Minister te kal ziah tura thutlukna an siam erawh, “Se bo hnua Se kawngkhar” angah kan ngai a, mipui sum tih hek thlawnna mai mai niin kan hria: mipui sum senga hetiang tei hawi mai mai a mipui bum tum loa Mizoram mipui rawngbawl tak zet turin Chief Minister leh a thawhpui ZPM Legislature party kan ngen a, an inzawrhna ang taka Val Upa Council (VUC) an tih pawh che chhuak turin kan phut tel bawk.
“Sorkar inthlahdah vang liau liaua kawngpui chhia hian Lirtheia eizawngtute leh mipui nawlpuite min nghawng na tawh hle a, Lirtheia sumdawngte bakah Sumdawng dangte pawhin zawrh tur kan nei mumal tawh lo a, thawktute hlawh leh kan hmun hma luah hawh man pek tur pawh kan harsat ta hle a, tun ang taka sorkar inthlahdah vanga Sumdawngin harsatna kan tawh hi hriat tur a la awm ngai lo a, Mipui hnen aṭanga sorkar awm tawh zawng zawngin an la lak ngai loh kawngpui siam nan liau liau-a Diesil leh Petrol aṭanga chhiah sâng tak an lak zozaite hmanga min tiam ang ngeia kawngpui hi siam tur leh enkawl chhunzawm turin Sorkar kan phut a, ram mipui tawrhna thleng mekah midang mawhpuh kual mai mai tawh lo turin kan ngen a ni.
“MBCC chuan thil awm dan a zir chiannaah kawng enkawltu PWD ten Sorkarah pawisa a dil reng chungin sorkarin kawngpui aia ngaih pawimawh dang a neih avanga kawngpui siamna tur liau liaua chhiah lak pawh an hman tir thei lo hi mak kan tiin kawng chhiat chhana mawhphurtu berah sum enkawltu Chief Minister hi kan ngai a, nawmsip bawl hmasa loa Mizoram mipui chak lakna kawngpui pawimawh tak takte hi ngai pawimawh hmasa turin kan ngen a ni.
“Sorkarin a ngaihsak loh vanga kawngpui chhia hi a bik takin Lirtheia sumdawngten kan tuar nasa hle a, thla tina kan Loan rulhna senso bakah sorkara chhiah chi hrang hrang kan pekte hi a tam em em a, heng bakah kawng chhiaa motor kan tlan tir hian motor-in a tuar em em bawk a, heng harsatna hrang hrangten Lirtheia sumdawngte min ti mangang tak zet zet a, a hun taka road tax leh chhiah dang pek kan harsat chho tawh hle mai a, sorkarin hriatthiamna hun min siam sak turin sorkar kan phut bawk a ni.
“MBCC chuan ni 04&05/08/2025 khan helai kawngchhiat vanga Lirthei tangkhangte a hmunah kalin kan en a, Lailapur thlengin Mizoram mipui mamawh bungraw phur Truck 1000 vel a tangkhang mek a, heng Truck enkawltu driver leh handlemen te kawngchhiat vanga thla khat dawn ei leh in bakah an inthiarna turte hi ngaihtuah chuan a rapthlak em em a, India sorkarin ram mipui kan lo hrisel zawk nana faina beihpui ‘swachh bharat mission’ a kalpui mek nen pawh a inkalh tlat a, harsatna rapthlak tak kan tawk mek tih hi Sorkar hian min hriatpui se la, hetiang ang em ema rapthlak harsatna hi thleng tawh ngai lo tura mipui rawngbawlna hna ngai pawimawh turin Mizoram sorkar kan ngen a ni.
“Tunah hian kan chaklakna kawngpui awmchhun hi Fourlane atana buatsaih mek a ni a, Contractor NHIDCL leh an Sub-contractor te hnathawh vila endik ngam turin sorkar kan beisei a, an hnathawhna area-a District thuneitute pawhin NHIDCL leh an Sub-Contractor te’n ram neitu Mizote an sawisel rual ruala a dik leh dik loh pawh zirchiang hmasa loa hma la zung zung tawh lo tur te, a ram chhung mipuite harsatna tawh apiangah Contractor leh an Sub-contractor te hma chhawn ngam tawh zawk turin District thuneitute kan ngen nghal bawk a ni,” tiin an tarlang.
