Vawiin khan Congress Thalai (MPCC) chuan thuchhuah siamin, “Mara Autonomous District Council (MADC)-a Member of District Council (MDC) inthlanpui May ni 5, 2022-a felfai leh muanawm taka neih a ni thei hi lawmawm kan ti a, May ni 9, 2022-a MADC inthlanpui vote chhiara result-te felfai taka puan a ni ta hi a lawmawm takzet a ni.
“Kum nga dana inthlanna neih thin, MADC-ah hian tun dinhmunah party mala sorkarna siam thei awm rih lo mah se, zahawm leh tluang taka Mara ram mipuite tana Autonomous District Council sorkar nghet tak a din ngei theih nan, Congress Thalai chuan Mara ram mipuite duhsakna kan hlan bawk.
“Kumin MADC inthlanna hlawhtling taka kaihruaitu official te, inthlanna atana pawimawh ber mipui leh, candidate zawng zawngte thawhrimna avangin inthlanna fel tak neih a ni hi a lawmawm a. A tling zo lo te kan tawrhpui rualin, MDC thlan tlinte Mara ram tana an theihna leh thiamna hmang tangkai leh zual turin duhsakna kan hlan a ni.
“MADC-ah hian Congress Party pawh kum 2019-a kan MDC-ten BJP an zawm tak hlawm avangin, tun inthlanah hian engmah lo atangin bul kan tan a ni a. Bultanna hniam tak atanga MDC pali (4) lai tun MADC inthlana Congress-in kan nei thei hi, Mara ram mipuiten Congress party-a rinna an la nghah zia tilangtu a ni a, Mara ram mipui chungah lawmthu kan sawi takmeuh meuh a ni. Kum 2023 Mizoram Legislative Assembly inthlanpuiah Mizoram pumah Congress Party chu MPCC President Pu Lalsawta hovin ; mipui sorkar leh sorkar tha din turin hma kan la dawn a, he kan hmalaknaa tel vek turin Mizoram mipuite kan sawm a ni,” tiin an tarlang a ni.
