BJP Mizoram Pradesh chuan thuchhuah siamin, “12th MADC General Election neih zawh takah, Mara mipui te’n MADC hmasawnna atana BJP MDC 12 lai mai, MADC-a hmasawnna a thlen theihna tur atan thlantlin an ni hi lawmawm kan ti hle a, hetiang taka Development-a tui halna MADC ah a awm ta hian MLA General Election 2023 ah pawh nghawng thui tak a neih ngei kan beisei a ni,” an ti.
BJP Mizoram Pradesh chuan vawiin 10th May, 2022 chawhnu Dar 1:00 hian MADC Election-a MDC Member 12 lai mai an neih avangin Pathian hnena lawmthu sawina hun an hmang a. He hun hi Pu K Laldinthara, State Spokesperson in kaihruaiin, Pu Johny Lalthanpuia, State Media Incharge in Hunserh a hmang a, Pu R Vanramchhuanga, State General Secretary in Thusawina hun a nei a ni.
Pu R Vanramchhuanga chuan, “BJP in hmasawnna hmel thar duhawm tak kan nei chho hi a lawmawm hle a, Mi tam tak te’n BJP chu Hindu Party emaw ti tlat an awm laiin, tun hunah erawh chuan chung chu Politics-a inchirh thehna mai a ni tih an hre tawh a, chuvangin tun hunah pawh MADC atangin MDC Member 12 lai mai, Autonomous District Council hmasawn nan an thlang tling ta hi a mak lova, BJP chu Development Party kan nih avangin Politics kan khelh chhan ber Hmasawnna duh vangin MADC ah BJP hmel thar kan hmu ta a ni,” a ti.
Pu R Vanramchhuanga chuan, “Vawiin ah hian Central BJP hruaitu te’n Mizoram mipui te BJP member ni a Hindu-a inlet tur anga an sawi fo hi tun hunah hian hetianga sawi thin te hi ka zawh duh chu, Central hruaitute hian BJP-a awm Hindu-a inlet tura an tih tawh tute nge? Tih hi a ni. Vawiin ah hian BJP Member te hi Hindu turin min thlem ngai lova, Central BJP chuan India ram pum hmasawnna rualkhai taka thlentir hi an tum leh an duh ber a ni a, chutianga Development hna thawk tur chuan Mizoram ah hian Sorkar rintlak leh an rinngam an duh a ni. Tun hunah hian Central hian Mizorama Sorkar lai mek hi an ring zo lo tih a lang chiang reng a, achhanchu sum leh paiah nasa taka harsatna kan tawh mek vang te hian achiang a ni.
“Sorkar hian a hnathawk te pawisa bat loh aram pawh a nei tawh lova, an mi te thlamuan nan Union Budget a Rs. 400/500/- Crore vel an dah hi an sawi reng mai a ni. Hei pawh hi ‘DPR an han siam mah nang anga Union Budget-a sum an dah hi an hmang thei ngut angem?’ tih hi zawhna lian tak a ni. Chuvangin Central Sorkar chuan Mitinin an chanvo an chang tur a ni tih hi an thupui a nih angin, Development tak tak Mizoram ah Sorkar kan siam a ngai a, chutiang taka an rinngam leh an duhsak tak tak tur Party chu BJP hi kan nih avangin tuna MADC-a BJP in Result ṭha tak kan neih ang hian 2023 MLA General Election lo awm turah pawh Sorkar ngei turin hna kan thawk dawn a ni,” a ti bawk.
