Aizawl May 10: Champhai District-ah chuan vawiin May ni 10, 2022 khan vawk 83 thiin 96 te suat an ni leh a. February ni 4, 2022 atanga vawiin thlenga ASF ni ngeia rin avanga vawk thi zat chu 1431 niin, vawk 1349 te fimkhur thu-ah suat an ni a. Avaia vawk thi leh suat tawh zat chu 2780 a tling tawh a ni. Hrileng zel tur ven nan ram dang leh state dang atanga vawk, vawksa leh vawksa atanga siam Champhai District-a lakluh phal loh mai bakah, Champhai District chhung eng khuaah mah lakluh leh phurhchhuah phalloh chhunzawm zel a ni.
Hemi chungchangah hian nimin chawhnu dar 1 khan Champhai Bawrhsap Pu James Lalrinchhana hovin Champhai District Level Committee on African Swine Fever & other Transboundary Animal Diseases (TADs) chu DC Conference Hall-ah an thukhawm a. African Swine Fever hrileng avanga harsatna awmte leh hmalak dante ennawn niin, vawk thi phumna neilo te tana phumna tur chungchangte ngaihtuahho niin hmalak nghal a ni.
Pu James Lalrinchhana chuan African Swine Fever hrilengin nunphung leh khawsak nasa taka a nghawng thu sawiin, hrileng vanga vawk chan leh harsatna tawkte a tawrhpui takzet thu leh theihtawp chhuaha hmalak mek zel a nih thu a sawi a. District run mektu vawk hrileng African Swine Fever beihlet kawngah nasa lehzuala tanlak a ngaih thu leh thahnemngai taka thawhho a tul thu a sawi a. Harsatna tawhte sawrkar hotute hnenah thlen a nih thu sawiin, khaw tina mamawh angte zirchianga project siama hmalak mek zel a ni a, disinfectant leh mamawh dangte pawh tam zawk lo thleng leh thuai tura beisei a ni, a ti. District Level Committee hmingin vawk hrileng beihlet kawnga bialtu MLA leh Mizoram sawrkar hotulute tawiawmnaah lawmthu a sawi bawk.
Dr. B.Lallawmsanga, District Animal Husbandry & Veterinary Officer (DAH&VO), Member Secretary, District Level Coordination Committee on African Swine Fever chuan ASF chungchanga District dinhmun tlangpui tarlangin April ni 27, 2022 a District Level Committee thurel bawhzui a nih dante a tarlang a. Disinfectant tam zawk nei tura hmalak dan leh mipui hnena fimkhur tura inzirtirna leh hriattur tur digital flyers kaltlanga thehdarh a nih dante a sawifiah bawk a. Rapid Antigen Test result behchhana hrileng dinhmun puan dan tura hmalak dante pawh a tarlang tel bawk.
Thukhawm chuan vawk thi a awm belh zel avanga phumna hmunhma nei lova harsatna thleng mekte a ngaihtuah a. District Level Committee hnenah vawk phumna tur hmunhma dilna lut pakhat a awm thu pawh tarlan niin ngaihtuahho a ni a. Vawk thi phumna neilo tan Sub-Hqrs YMA (SYMA) Champhai ten khawtlang mamawhna hriaa phal taka Keifangtlang, Hmunhmeltha road kawng thlang ami an ram hman hawh an phal thu meeting-ah hian tarlan a ni a. District Level Committee thukhawm chuan SYMA chungah lawmthu sawiin, a hmunhma cheibawl dan turte a hmunah kalin enfiah nghal a ni a. JCB hmanga vawk phumna tur laih nghal a ni.
Vawk thi reng reng VC ah inhriattir hmasak hnuah Department lamah hriattir thin ni se, vawk phumna remchang neilo ten a phumna hmun tura ruat pan mai ni se tih a ni a. A hmunhma cheibawl, vawk thi buaipuitute leh lirthei tihthianghlim bakah inzirtirna tarlang thei siam turin Vety. Department chu hma la tura ruat an ni bawk.
A.H & Vety. Department, Champhai tarlan dan chuan ASF hrileng thawhkhatna chu kum 2021 May ni 9 khan Champhai District-ah Zokhawthar khuaah hmuhchhuah a ni a. Vawk 548 in thihpuiin October 2021 khan ASF vanga vawk thi hnuhnung ber report a ni. ASF thawhhnihna chu kumin February ni 4, 2022 khan Champhai Electric Veng atanga report a ni a, March ni 21, 2022 khan NDDRL Bhopal chuan a finfiah a ni. Tun thlengin khua leh veng 23 te nghawng mekin khua/veng 12 te ASF hrilenna hmun ‘Infected Area’ ah puan a ni tawh a. Veng/khua 11 dangte atanga sample lak result nghah mek niin, result azira hrilenna hmuna puan theih reng an ni.
