Vawiin khan Blessino Nursing School, Maubawk chuan International Nurses Day hmangin, Aizawl West III bialtu MLA Pu VL Zaithanzama chu khual lian a ni.
Pu VL Zaithanzama, MLA chuan, “Ni pawimawh tak tak kan hmang ṭhin a, sawrkar pawhin holi day-ahte hial an puang thin. Chutih laiin ni pawimawh em em Nurse te Ni erawh mipui nawlpuiten kan hre mang lo hi a pawi hlein ka hria. Nurse hna hi hna zahawm a ni a, mahni mihring puite enkawl tura inpe an nih avangin an hlu em em a. Dam loh hian nurse te hlut zia leh pawimawh zia a lang ṭhin a ni. Hna a vang em em a, chutih rualin Nurse hna erawh engtik lai pawhin thawh tur a awm a, sawrkara lut kher lo pawhin hna thawh tur a tam em em reng a ni. Dam lo enkawl kawngah Mizo Nurse te tluka ṭha India ramah an awm lo’ tiin Mizo nurse te a fak a, ‘Doctor ṭha leh hospital changtlung zawk chu nei ila vai ram pan ngai lovin min rawn pan zawk ngei ang’ a ti bawk.
Blessino Nursing School hian International Nurses Day hi Assembly Hall, BNS Hostel-ah hmangin programme hi session hnihah an ṭhen a. Zing dar 9:30 aṭanga ṭanin VL Muanpuii, Vice Principal chuan International Nurses Council-in theme a neih Nurse te dinhmun chawikan leh pawimawhna hrang hrangte sawiin The Lady with the Lamp – Florence Nightingale chanchin a sawi bawk a. International Nurses Day hi nilengin intihhlimna programme nen Blessino Nursing School chuan an hmang a ni.
