AGiriculture Minister C.Lalrinsanga chuan AMFU chu loneitute tana kawng tinrenga hmalatu leh anmahni tiphurtu an ni tiin vawiin khan Pu C.Lalrinsanga, Agriculture Minister chuan All Mizoram Farmers Union (AMFU) General Assembly vawi 18-na, Durtlanga neih chu khuallian niin a hmanpui. Agriculture Minister hi Land Revenue and Settlement Board Vice Chairman Pu Rochhunga Ralte leh Agriculture Director Pu James Lalsiamliana ten an tawiawm a ni.
Agriculture Minister chuan Agriculture-a a tuina chhan sawiin Mizoram economy dinhmun a vei vang a ni, a ti a. Kan economy a that a, kan fairel ber a khah chuan hei hian kan ngaihhlut zawng, kan rilru puthmang, kan moral thlengin a tha zawngin a kaihruai dawn a ni, a ti. Agriculture Minister chuan agriculture-a hmasawn turin tharchhuah tih pun leh a hralhna neih that a pawimawh em em a, chutihrual erawh chuan a bulthumah kan leilung enkawl, cheibawl leh hman thiam a pawimawh, a ti a. Soil management atanga bul kan tan a tul tiin sawrkar pawhin hemi kawnga hma kan sawn theihna turin tan a la mek a ni, a ti. Pu C.Lalrinsanga chuan kan ram leilung hman dan turah chherchhuan thuma kalpui a rawt a, chungte chu a hmasak dan indawtin – terrace, cash crop plantation leh theirah nei thei chi ngaw siam te a ni a. Mizo tlangram lo neih dan shifting cultivation kan hman mek hi thlak danglam theih a nih a beisei thu a sawi bawk.
Agriculture Minister Pu C.Lalrinsanga chuan thei leh thlai hrisel tharchhuah a pawimawh a, kan thei thenkhat a bik takin serthlum rah chuan kum sawm kalta a pha tawh lo, a ti a. Thlai leh thei hrisel tharchhuak thei tur chuan a mamawh ei tur tha nutrients hmanga kan chawm a tul a. Chumi ti tur chuan kawng hrang hranga hmalak mek a nih dan vawiin programme ah hian a sawi a. CSIR leh North East scientist ten leia bacteria chi khat an hmuhchhuah hmanga fertilizer OP-12 Bio Fertilizer tia an vuah, an patent tawh chu a technology an lei thu leh Mizorama loneitute hman tangkai theih turin buatsaih thuai an tum a, kumin chhunga hman tan theih tura peihfel an inrin thu a sawi a ni. Heng bakah hian SEDP kaltlanga vaimim leh bekang chin kawnga hma an lak dan te, thlai leh thei rah a roa thawnchhuah theih tura sawngbawlna hmanrua solar dryer engemawzat bun tum a nih thu te, cold storage siam chungchang te, ranchaw siamna khawl engemawzat dah theih an beisei thu leh Sawrkar hmalakna dangte he hunah hian a sawi a ni.
Vawiin programme hi AMFU Sr.Vice President Prof.Chawngkhuma Chawngthu chuan a kaihruai a. General Secretary Pu Lalduhsanga Pachuau chuan an pawl hmalakna report pein an President Pu Joseph H.Thanzuala’n thusawina hun a hmang bawk.
