Vawiin May ni 12,2022 (Ningani) chawhnu khan MPYCC (Congress Ṭhalai) chuan President Dr. Lalmalsawma Nghaka hovin Pu John Neihlaia IPS, IGP an hmu a. MPYCC hruaitute hian tun hnaia ramri depa Mizoram Police duty thenkhat ; an tui tlan nu tak ‘video record’ siama social media lama darh ta avanga ‘suspend’ tawk ta Hav. Dengthangpuia leh hemi kaihhnawiha May ni 13, 2022 hmaa insawifiah tura mi pathum an kohte thlavang hauhin IGP hi an sawipui.
MPYCC chuan, “Tuihawk nu tak ‘video viral’ ta kha Saipum khua atanga Km 20 vela hlaa Police-te duty-na hmun a ni a. He video social media-a a darh avanga Police thenkhatin harsatna an tawh chungchang Congress Thalaiin IGP Pu John Neihlaia hnena kan sawipui hian rahtha a thlen ngei kan beisei a. Pu John Neihlaia pawh hian hemi chungchangah hian hma a lak tur thu MPYCC te hi min lo hrilh a ni.
“Assam leh Mizoram ramri buai a reh theih loh avanga ramri-a duty kan Police ten thil lian tham lo taka hrem an tawk ta mai hi Congress Ṭhalai chuan vanduaithlak kan ti a. Ramria duty Police-te duty-na hmun hi ruahtui pawh tla se motor-a tlawhpawh zung zunga siam tur anih laiin, sawrkarin a hnuchhawn tlat hi Congress Ṭhalai chuan pawi kan ti hle a ni.
“Hei mai bakah hian ramri duty Police-te awmna hmun mumal lo leh tui tlan tur mumal awm lova ram chhan nana Police duty-ten hotute vaukhanna an tawk hi Congress Ṭhalai chuan pawi kan ti takzet. Kan sawrkar hrawn mek hian ramria duty-te ngaihsak a, tuna ‘suspend’ tawk tak leh insawifiah tura kohte hi zahngai taka hrethiam a, an hrehawm tawrh mekte thawi dam nan thupek kal mek sut turin Mizoram sawrkar kan phut a ni,” MPYCC chuan tiin, “Kan ram himna tura ramria duty mek kan Police-te kan chhuang tak meuh a, harsa tam tak kara ram leh hnam tana chhel taka rawngbawl zel turin kan ngen a ni,” a ti bawk.
