Mara Autonomous District Council ah MNF leh Congress thawk ho dawn

12th MADC sorkarna chu MNF & INC Jt. Legislature Party chuan a siam dawn ta. CEM atan H. Malvina Phura Bialtu (INC) a ni ang a, Dy. CEM atan H.C. Lalmalsawma Zasai (MNF) Amotlah bialtu an ni ang, MADC Chairman N. Viakhu Siaha South bialtu (MNF) chu Chairman a ni bawk ang.
Mara Autonomous District Council MADC inthlan zawh takah result puan atanga ni 8 hnu ah sawrkarna siam thei khawp MDC nei party an awm loh avangin, nimin khan Congress leh MNF party chuan inremna siamin, MADC-ah hian sorkarna an siam dawn ta a ni. An thawhhona turah hian ruat seat pathum aw theiah ah INC-in pakhat, MNF-in pahnih an chang ang.
Tarlan tawh angin Larsap Dr Haribabu Kambhampati chuan Mara Autonomous District Council (MADC) chairman thlan hun atan Nilaini (May ni 18) a ruat a. Larsap chuan MADC chairman inthlan hma ni Thawhlehni ah chuh tumte hming pekluh theih hun a hawng bawk a. MADC official-te’n an sawi dan chuan chairman thlang tur chuan MDC 13 talin an vote tlin a ngai a ni.
Hetih lai hian Inrinni khan Mizoram Pradesh Congress Committee (MPCC) chuan an political affairs committee (PAC)-in BJP leh MNF sorkarna siam tura tanpui an tum loh thu an puang nawn leh a. Aizawla chanchinbumite hnenah an sawi danin Congress hian tuna MADC inthlanna-ah MDC 4 chiah an titling a. Hei hi a nih avangin Mara mipuiin eptu lama thu turin thutlukna an siamah an ngai a. Mipui duhdan chu zahsakin eptu lamah an thu mai dawn niin an sawi.
May ni 5-a MADC inthlanna-ah khan sorkarna siam thei khawpa party mal chak an awm lova. BJP chuan MDC 12 neiin sorkarna siam thei khawp tur MDC 13 an nei zo lova. MNF in bial 9 la-in Congress-in bial 4 an la a ni. Council thutkhawm hun tura state election commission-in a ruat Zirtawpni khan protem chairman kaihhruaina-in an thukhawm a. Mahse, sorkarna siam thei an awm loh avangin an sarual tin leh ta ringawt a ni.