Vawiin khan ZPM chuan thuchhuah siamin, “Tun hnaia kan ram hmasawnna hnathawh, NHIDCL kawng laihna leivungin kan ram lui a tihchhiat chu ZPM chuan a ngai thutak hle a. Ram hmasawnna leh khuarel leilung Dân hi inbuk tawk, chhuan lo la awm zel tur te tana daihrei (sustained) taka kalpui tur a nih laiin, hetianga kan ram hmasawnna hnathawhin kan leilung leh nungchate tana thil tha lo a thlen hi ZPM chuan pawi a ti takzet a ni,” an ti.
Thuchhuahah chuan, “Hmun ṭhenkhatah chuan Ram neitute leh VC ten uluk taka ngaihtuahna sengin leivung paihna (Spoil Bank) tur hmun an pe a, buaina awm thei atan an lo in hmakhua a ni. Kan ram hmasawnna hnathawktu thenkhatin leivung an paih zawh hnu, a volume an hriat hnuah chauh a dawlna an siam ṭhin hi a fel lo niin alang a, an dawl hmaa ruah a lo sur chuan chhiatna nasa tak a thlen palh thei a ni.
“Hmasawn hi a tha a, hmalam pan zel tur pawh kan ni a. Chutihrualin, ZPM ngaihdanah chuan kan ram leh hnam a him em? A chhunga cheng te, mihring mai piah lamah thing leh mau leh nungchate an him em? tih a ni a. Pathian leh mipui zarah ZPM-in sawrkarna kan siam a nih chuan leivung, hnawksak taka kan awmtir thin leh harsatna nasa tak min siamtu hi hman tangkai dan kan ngaihtuah fel tawh a; policy -ah pawh felfai takin kan dah tawh a ni. Leivung hi awmze neia sawngbawl a nih loh chuan kan environment-in a tuar a, mi tam tak harsatna thlentu, buaina thlentu a ni thei a. ZPM chuan hei hi hriain, policy-ah fel takin leivung sawngbawl dan (leivung management) dahin, tangkai taka hman dan kan ngaihtuahin, kawng kawi lak ngil nan te, khuar leh hmun hma rem lo hnawhkhah nan te, hmun rem lo siamrem nan te, park leh recreation hmunhma siamrem nan te hman tangkai theih a ni a. Pathian leh mipui zarah ZPM in sawrkarna a siam chuan heng kan leivung paih ral mai mai te hi awmze nei leh tangkai zawka hmangin, kawng laih tur reng reng khawtlang hruaitute leh engineer-te nen enho hmasain leivung paih tur chu playground leh hmunhma tuldang hnawhkhah nan an hmang thin dawn a ni.
“Thingtlangah Village Development Committee kan din dawn a, chu chuan an kengkawh ang a, Aizawlah AMC-in kengkawhin, Lungeiah LMC-in an kengkawh ang a, khawpui dangah te chuan town committee ten ruahmanna an siampui dawn a. Khawtlang hruaitute kutah leivung sawngbawl dan fel tak a awm tawh dawn a ni.
Mizoram sawrkar chuan July 29, 2020 khan NHAI, NHIDCL, NRRA, BRO, NABARD leh central sawrkar agency dangten Mizorama kawng an laih endik / vilzui turin Roads and Infrastructure Development Board a din a, Chairman chu CM niin member 13 an awm a. Zoramah furpui kan thleng chho mek a, he board hian a tihtur tak tiin kawng siam avanga ram mipuite, leilung, thing leh mau leh nungchate harsatna nasa tak a thlen mek lai hian chak zawka hmala nghal turin ZPM chuan kan phut a ni.
“Leivung paih hi uluk a tul tulh tulh dawn a, environment a tihchhiat theihzia te, mihring leh nungcha, thing leh mau ten an tawrh nasat theihzia te hrereng chunga sawrkarin a enpui a; kan rama hmasawnna hnathawhin kan ram leilung a tihchhiat loh dan tur ngaihtuahna nasa zawk sen a tul takzet tawh a ni,” tiin an tarlang.
