“Tun hnaiah ruah sur avânga Mizoram hmun hrang hranga sawrkâr sikulah, school building chhiat lutuk avânga zirlai naupangte leh zirtirtute thlabâr taka an awm leh, sikul kal thei lo hiala an awm hi ZPM ṭhalai chuan pawi kan ti,” tiin vawiin khan ZPM Thalai chuan thuchhuah a siam.
Thuchhuahah chuan, “Sikul chei ṭhat na tura sawrkârin NABARD aṭanga cheng vaibelchhe 35 zet a puk hnuah pawh ruahsur laiin tawmhulna mumal a awm loh avânga zirlai naupangte sikul choka-a khungkhawm an ni leh, naupang tana sikul compound a him loh avânga sikul chawlh hial a ngai hi a inhmeh lo hlein kan hria a, heng sumte hi a hmanna tur dik takah hman a ni lo em ni? tih hi education minister hian mipui hmaa sawifiah turin kan phut a ni.
“Zirna lama tawnhriat ngah tak ni-a ngaih, education minister enkawlna hnuaia hetiang thil duhawm lo tak a thleng hi ZPM ṭhalai chuan pawi kan ti a, he thil thleng hi education minister mawhah kan ngai a, fur ruah tui a la tlâk tam dawn chauh avângin hetiang thil duhawm lo hi a thlen nawn loh na tura chak taka hma la turin education minister Pu Lalchhandama Ralte kan phut a ni,” an ti bawk.
