Aizawl May 18 : Vawiin khan Mizoram State Museum, Art & Culture Department chuan International Museum Day an hmang a, Pi Carol VLMS Dawngkimi, Joint Director, Art & Culture Department chu Khuallian niin International Museum Day lawmna hi a hawng. He ni hmang tur hian a bikin Thingsiri Cultural Club, Govt T. Romana College bakah zirnain (institution) hrang hrang an sawm a. Mizo rimawi hmanrua chi hrang hrangte pholan niin a hman dan a taka entir a ni a, mipuiin an hlut hle.
International Museum Day hmanna Inkhawm hi Mizoram State Museum-ah neih a ni a, Pi P.C. Zosangpuii, Museum Curator chuan inkhawm a kaihruai a, Khuallian Pi Carol VLMS Dawngkimi’n thu sawiin, “Mizo hnam lo dinchhuah zelna tur leh kan hnam inpumkhat zelna turin kan nihna dik kan hriat chian a ngai a, chu mi atan chuan Museum hian chakna tam tak min pe thei a ni”, a ti.
Mizoram State Museum hian 2019-2020 sawrkar kum chhung khan tlawhtu mi 19971 an nei a, heng zinga mi 8 hi VIP an ni a, foreigner visitors mi 79 an nei bawk.
Khawvel pum puia Museum hrang hrangten ni bik, mahni remchan ang theuha a ruala an hman tlan turin Inter-National Council of Museum (ICOM)-in kum 1977 khan May 18, 2019 hi International Museum Day atan a puang a, Kumin hian khawvel pumhuapa International Museum thupui hi “The Power of Museum”, tih a ni.
Ministry of Culture, Government of India chuan India Zalenna Kutpui (Azadi Ka Amrit Mahotsav) lawmna atan India ram pumah A Week Long Celebrations for International Museum Day buatsaihin May 20, 2022 (Zirtawpni) thleng hian Mizoram State Museum chu en man awm lovin hawn a ni dawn a ni.
