MZP Rorelna sang Federal Council Sitting vawi 54-na (2021-2023 terma vawi 1-na) chu Vawiin ni 20th May, 2022 (Zirtawp) chawhma dar 11 khan MZP Conference Hall-ah neih a ni a. Hmun hrang hrang atanga lut; zirna khawih, ram leh hnam khawih leh pawl chhung khawih agenda 9 (pakua) ngaihtuah ho a ni. He hun hi Pu Andrew F. Lalramnghaka Vice President chuan Chairman niin a kaihruai.
Pu Lalnunmawia Pautu, President chuan, “MZP chu zirlai pawl a nih angin, kan pawl thiltum leh nihphung kan chian a pawimawh hle a. Hruaitu nih duh vang chauha MZP a inhmang ni lovin, zirlaite harsatnaa sutkian puitu, zirlaite lamṭang kan ni reng tur a ni” tiin palaite a fuih a. “Zofate chenna hmun Zofate’n kan chan zel loh nan leh kan humhim zel theih nan, MZP chuan theihtawp a chhuah zel dawn a. Hnam dang kuta kan ram a luh loh nan nasa takin ke a pen zel dawn a ni” a ti.
“MZP chu sawrkar do ngawr ngawr tur kan ni lova, thilṭha an tih chuan sawrkar thawhpui tur leh an kalsual tur venga an tih dik lohte dodal tur kan ni a. Kan hmalakna reng rengah kan ram leh hnam himna kan dah pawimawh hmasa ber tur a ni. Zirlaite hi rilru fim tak pu tur kan ni a, politics thli chhia leh inchirhthehna lak atangin i fimkhur ang u” a ti bawk.
MZP Federal Council Sitting vawi 54-na chuan hengte hi lungrual takin a pass.
1. Mizoram puma zirnain hma a sawn theih nan, sawrkar enkawl school leh college zirtirtu leh zirlai awm dan zirchian a hmalak ni rawh se.
2. National Institute of Open Schooling (NIOS) hnuaia zirlaite harsatna, Fees leh Result chungchang sutkian anih theih nan hmalak ni rawh se.
3. Mizoram sawrkarin school zirtirtu, Transfer & Posting Rules a neih mek hi, ataka hman anih theih nan MZP in hma la rawh se.
4. Sawrkarin zirtirtu hna a lakah hian, tling leh tlak (Qualified) ngei lak anih theih nan MZP in hma la rawh se.
5. Mizo mipuite’n eirawngbawlna Gas Subsidy chungchangah harsatna kan tawk fova, chinfel a nih theih nan
hmalak ni rawh se.
6. Sawrkar hna thar lak reng rengah dik taka lak anih theih nan MZP in hma la rawh se.
