PC Party General Secretary V.L.Thazova chuan Vairengte – a Diesel leh Petrol dah khâwlna ( Oil Depot ) a tlawh a. “Thenawm state leh Mizoram inkarah engemaw hlek buaina a lo awmin, heng thil pathum pawimawh èm èm mai, an tel loa ni khat pawh kan khawsak theih lohna buhfai, petrol leh diesel te hi Mizorama kan phurh luh theih lohna turin phai Vai ten kawng an dan pin ( block) thuai zèl avang te, khuarel chhiatna tuilian leh lei minin harsatna min thlen thin avang te in , chûng buaina laka kan lo inven nân leh kan lo inhmakhawsuih làwk nân tiin,Brig.T.Sailoa kaihhruai PC sawrkar khàn Vairengte – ah kum 1982 khàn Emergency Crash Scheme ( hna hmanhmawh zual bik) Mizoramin buhfai thla sawm chhung kan ei tûr chhêk khãwl theihna tur kudam( godown ) leh diesel leh petrol thlathum emaw tàl daih tur dah khawlna tûr Oil Depot te an lo bûn tawh a.
“Nimahse, heng kan ram tàna thil hlu leh tangkai tak te hi hun engemaw chen hman a nih tawh hnuah kum 1984 PC a sawrkar tawh loh atang khân hman zui tawh lo vin, hluihlawn a ni ta ringawt mai a.Ram leh mipuite hmakhua ngaia hmalakna awm sà pawh bawhzui tum miah lo leh ,kum 30 ràl kan kai tawh hnu thleng pawha kan ramin kan mamawh ngawih ngawih oil depot bùn thar thei miah lo sawkar kan hrawn thin hi a vanduaithlakin a lungchhiatthlak takzet a ni,” a ti bawk
