AMC lei tha hralhchhuak tan

Aizawl Municipal Corporation chuan a vawi khatna atan lei tha an siam – AMC Compost chu Kolasib tlangdung amite hnena hralh turin bag 100 an hralh chhuak a. Vawiin tlai khan AMC office Thuampui atangin mayor Lalrinenga Sailo chuan a vailiam. Leitha hralhchhuah tur vailiamna inkhawm kaihruaitu AMC executive councillor Laltlanzova Khiangte sawi danin, AMC-in kumin January 20 atangin Solid Waste Management Centre a enkawl tan thu leh bawlhhlawh tawihtheite leithaa siam turin Waste Tech and Bio-Energy Ramhlun North a thawhpui a. Tuna AMC leitha hralhchhuah hmasak ber hi bag 100 – kg.15 leh kg.25 a ni a, a vaiin kg. 2000 phurhchhuah a ni. “Leitha hi reiloteah AMC office-ah pho chhuah a ni dawn a, a duh apiang tan a lei theih dawn. Kg 15 bag hi Rs. 150 man a ni anga, Kg. 25 bag hi Rs. 250 man a ni ang,” a ti. Aizawl mayor chuan AMC-in Solid Waste Management Centre enkawl nan duhthusamin thawktu leh sum leh pai nei lo mah se, mawhphurhna pek an nih miau avangin chonaah ngaiin bawlhhlawh sawngbawlah mawhphurhna an la tih a sawi. “Bawlhhlawh atanga lei tha kan siam a taka kan hmu thei leh kan hralhchhuak thei ta hi lawmawm ka ti hle a. AMC leitha hi a hmang tawh chuan a tha an ti zel a. Kei ngei pawhin ka enchhin a, a tha hle a ni,” a ti. Laboratory-ah pawh enfiah thlap a nih thu leh loneitu leh leitha mamawhtu zawng zawngte tan a tangkai a beisei tih a sawi a ni.