Aizawl May 26 : 23rd May, 2022 khan Japan International Cooperation Agency (JICA) team te chuan ni 5 cham turin Mizoram lo tlawhin, Environment, Forests & Climate Change Department in “Biodiversity Conservation and Forest Enrichment Project’’ proposal an siam chu a hmunah an rawn enfiah a. JICA team te hi ni 24 may 2022 khan EF&CC Minister Pu TJ Lalnungtluanga, Dr. K. Pachhunga MLA leh EF&CC Dept, Horticulture leh Tourism department hotute nen meeting discussion an nei a, nizan 24.5.2022 khan JICA team memberte hi EF&CC Minister chuan zanriah a buatsaihsak bawk.
Minister Pu TJ Lalnuntluanga chuan JICA Team te chungah lawmthu sawiin Mizoram hi hmasawn mek kan nih thu te, tuna JICA project hmang hian bung thar kan kai ngei a beisei thu te, kan ramin kan mamawh em em kan tuihna humhalh leh lui dung a thing phun te hi he project hmang hian chak takin kalpui a beisei thu a sawi. Mizoram hian he project hmang hian environment lamah hma nasa taka a sawn a rin thu a sawi bawk. JICA atanga hotu lo kal te hi mi 7 an ni a, vawiin leh naktuk lamah Project neihna hmun tura thlan te tlawh kualin ni 27 hian an let leh ang.
