@ R Dengṭhuama Indoor Stadium, Mualpui
RESULT – SEMIFINAL
May 25, nilaini zan :
Durtlang North def Tuichangral (mipa)
– 25-22, 16-25, 25-18, 25-11 (3-1)
D3 Business Player of the Night
– Sahil Kumar (Tuichangral)
Amrit Premium Plus Cement Fan of the Night
– Valzotea (Tuichangral)
* Durtlang North-in thawh hona hmangin mi mala innghat Tuichangral laka an tlawm tawhna an chhang let a, Zothan Autoworks Pro Volleyball League semifinal-ah set thum set khatin an chak. Lalbiakmuana’n a theihna lantirin championship kal meka a khelh ṭhat berah point 11 hmuin vawi khat chiah a tisual a, Durtlang North tanpuiin a zawnin final an lut. Pro Volleyball hnuhnung ber 2019 final-ah rin hlawh zawk ni chungin Chhinga Veng Spikers lakah an tlawm a, zirtawpni zanah league-a an hneh tawh TNT nen trophy an inchuh ang.
* May 17 khan league-ah intawng tawhin Tuichangralin set hmasa ber an hloh hnuah set thum la zawnin ropui takin an kir leh a, thil thlen dan pangngai angin a tir lamah Vanlalmawia’n Durtlang North chawi kangin set hmasa ber an la. Khaw chhak team-in nawr letin filawr takin Sahil Kumar a inlar a, awlsam takin set hnihna an la ve leh.
* Mahse, set thumnaah Durtlang North-in thil awm dan tidanglamin inkhairual leh inpumkhat takin an khel a, set hnihna thlenga talbuai Sagar Malik chuan ngaiawh chhovin tute pawhin an chanpual hlenin point an hlawh chhuak thei vek a, phur leh inringtawk takin an khel. Tuichangral innghahna Sahil a zuang tamin a vaw hnem hle a, a tir set hniha a inlan dan pha lovin a tlahniam. Amah thlawp thei ber Saidingpuia’n team a fuih phur zo bik lo va, thawh hona ṭha tak nena khel Durtlang North-in set thumna atangin inkhel an awpbet tluan a, lehlam an zuih ral ve thung.
* Hnehna an chan theih nan Durtlang North player-te an ṭangkai dan a inchen tlang hle a, Biakmuana bakah Mawia’n vawi 12 vaw tlain point thum a hloh a, Vanlalṭanpuia’n point 10 hmuin ṭum hnih a tisual a, Sagar chuan point 10 a paih laiin 18 a hlawh bakah Fabian Lallunghnema’n point sarih hmuin point thum a hloh a ni.
* Tuichangralin team pum pui leh mi malin a hma an phak lo viau a, Sahil chuan Durtlang North an hneh ṭumin point 50 hmuin 15 a hloh a, tun ṭumah 35 hmuin 14 a paih. D3 Business Player of the Night-a thlan ni tho mah se team a chakpui zo lo va, Saitea’n point 14 a hmuh zat chanve hloh bawkin, mi dangin awmze nei thamin an khel pha lo vek a ni.
* Thawhlehni zan khan semifinal hmasa zawkah 2016-a final khel tawh TNT-in league-a sang ber leh set thum faia an hneh loh tawh Hunthar an lehthal a, an hneh tawh lakah league-a pahnihna Tuichangral tla ve lehin 2018 ang bawka final luh an inbeisei a tawp.
* Durtlang North-in final-ah set thum set khata an hneh tawh TNT an hmachhawn ve thung dawn a, thil kal dan aṭangin knockout round-ah league-a chak tawh an tlawm zel. Semifinal lut zinga rin hlawh zo lo team pahnihin final an khelh ṭum hnihna tur ve ve a ni a, a vawi khat nan champion tum ve vein an innuai dawn a ni.
Player stats :
DURTLANG NORTH
Lalbiakmuana : point hmuh 11, point hloh 1
Vanlalmawia : point hmuh 12, point hloh 3
Vanlalṭanpui : point hmuh 10, point hloh 2
Sagar Malik : point hmuh 18, point hloh 10
Fabian Lallunghnema : point hmuh 7, point hloh 3
TUICHANGRAL
Sahil Kumar : point hmuh 35, point hloh 14
Saidingpuia : point hmuh 14, point hloh 7
F Lalngilneiha : point hmuh 3, point hloh 0
Lalrinhlua : point hmuh 2, point hloh 3
Lalruatfela Sailo : point hmuh 2, point hloh 4
FIXTURE :
FINAL – HMEICHHIA :
May 26, ningani –
8pm : Bungkawn v Bethlehem Vengthlang
FINAL – MIPA :
May 27, zirtawpni –
8pm : TNT v Durtlang North
