Vawiin May 27, 2022 hian Congress Bhavan-ah Congress Party Friday Political session neih a ni a. Pu James Thanghmingmawia, Secretary, MPCC-in kaihruaiin, Pu C. Lalhriatpuia, Media Secretary leh Pu KT Rokhaw, MLA-ten report an pe a, Pu Zodintluanga Ralte, MLA & Treasurer, MPCC-in thu a sawi bawk.
Pu Zodintluanga Ralte chuan Congress Party danglam bikna sawiin, “Congress Party hian party dang lakah danglamna lian pui a nei a, chu chu lalna leh thuneihna kiantu a nihna hi a ni. Khawvel hmun tam takah lalna an duh avangin thisen tam tak a luang a, mipuiin an tuar a, Mizoramah ngei pawh lalna inchuh vangin raltlan tam tak an awm phah tih kan hria. Thuneihna a duh avangin Russia-in Ukraine a run a, chhiatna rapthlak tak a thleng a, nunna tam tak a luangral a ni. Chutiang taka miin lalna an thlakhlelh lai chuan Mizoramah chuan Congress party chuan remna leh muanna a awm theih nan lalthutthleng kan kian thei tlat a ni. Congress avanga Mizoramin remna leh muanna a neih hlutzia hi i chhut nawn thin ang u,” a ti.
Sum leh pai enkawl thiam pawimawh zia sawiin, “Mizoramah Congress a sorkar apiangin sorkar budget, public money kan tih hi mipuite hnenah a let leh thin. Congress sorkar hmasak khan kan budget a la tlem lutuk; chuti chung chuan NLUP cheng sing 3 kan sem thei. Development a kal ngaia kal reng chungin a hnuah cheng nuai 1 kan sem leh mai bawk. Cheng nuai 1 sem chung hian hmasawnna hna tam tak kan thawk a, Tuirial Hydel Project kan din thei a, Medical College pawh kan din thei. MNF sorkar hnuaiah hian Mizoram hian eng hmasawnna liantham nge a hmuh? MNF sorkar hnuaiah mi rethei zawkten eng nge an dawn tawh? Khawiah nge cheng nuai 3 an sem? Khawiah nge an kawng chhawng siamte chu? Sum a tam zia sawi ringawt a ni lo. Hmasawnna awm tur chuan sum leh pai dinhmun a that a ngai a, sum leh pai dinhmun tha tur chuan finance management thiam a ngai. ZPM Leader Pu Lalduhoma’n Mizoram a Finance Minister tha ber a tih hi kan President Pu Lalsawta a ni. Chuvangin, sum enkawl thiam, sum harsatna laka Mizoram chhanchhuak thei tur Pu Lalsawta ho ngei hian Congress Party-in sorkarna kan siam leh a ngai a ni. Hnathawh tur, siamthat ngai a tam lutuk,” a ti.
Congress Party a thochhuak leh dawn tih sawiin, “ZPM hi an bul tanna a sang lutuk a, tunah chuan an than a tawp tawh, hmasawn ngaihna an hre tawh lo. An lawmluh tam zawkte pawh kum 2018-a ZPM supporter ni sa vek an ni. An hotute in ngeih lohna, siamthat ngaihna an hriat miah loh hian ZPM hi a vaw chhe dawn. Congress Party chu nasa takin kan insiamtha mek a, President hovin District fanchhuah programme kan hmang mek a, bial zawng zawng tlawhchhuah programme ‘Tomir Fehchhuah’ kan hmang mek bawk. Kan President Pu Lasawta’n siamthat hna nasa takin a thawk mek a. Kan mi leh sate an phur thar em em a, a hun takah Congress Party hi a tho leh dawn. Chuvangin, Congress Party tan zamna tur reng reng a awm lo,” a ti.
Pu Zodintluanga chuan Pu Robert Romawia Royte chu hmasawnna hnathawh enpuiah sawmin, “Pu Robert Romawia’n Aizawl East II bial chhunga Pu Lalsawta kum 10 hnathawh aiin MNF kum 3 hnathawh a tam zawk tiin April ni 14, 2022 khan Aizawl East II MNF Block Conference-ah a sawi a. Aizawl East II bial chhunga veng tina Pu Lalsawta hmasawnna hnathawh leh Pu Robert Romawia hnathawhte hi engtik lai pawhin en ho kan cho a ni tih Robert Romawia hian lo hre rawh se,” a ti bawk.
He hunah hian All India Professional Congress (AIPC) atangin Dr. Rita Zomuanpuii, Research Associate, Deptt of Biotechnology, MZU chuan “DNA hmanga ram leilung hausakna humhalh” tih thupui hmangin Powerpoint Presentation a pe bawk.
