Nimin June 2, 2022 (Ningani) chhun dar 12:00 (Noon) khan PC Party President Pu Lalhmangaiha Sailo leh Mizoram Grape Grower Society hruaitu Pu Francis Lalmalsawma Sailo te PC Party Office, Treasury Square-ah an inkawm.
He hunah hian Mizoram Grape Grower Society hotu Pu Francis Sailo chuan tun hnaia Mizoram Sawrkarin Grape Wine a mansak chungchanga harsatna an tawh dan leh an buaina leh mangannate sutkiansak tura Mizoram sawrkara hma lakna an neih meknaah beiseina an neih san thu a sawi.
PC Party President Pu Lalhmangaiha Sailo pawhin, Mizoram sawrkarin vawilehkhata kuthnathawka eizawngtute intunnunna sum hnar a chhutchhiatsak ngawt mai chu awm lo a tih thu leh inngaihnathiamna thui tak nei chunga hma lakna kalpui theih a nih thu a sawi a. Hetianga dimdawina tel miah lova kut hnathawktute chunga sawrkar hma lakna demawm a tih thu leh a rang thei ang bera grape grower society harsatna chin felsak turin sawrkar a phut bawk.
Nimina Mizoram Grape Grower Society hruaitute leh PC Party President inkawmna aṭang hian Pu Lalhmangaiha Sailo chuan hetiang hian Party ngaih dan a puang chhuak:
1. Mizorama loneitu, kuthnathawkten an thar chhuah sawngbawl a, man man zawka zawrh theiha siam a, eizawnna ngelnghet an neih hi ram hmasawnna bul a ni tih PC Party chuan a hria a, a ngai pawimawh hle.
2. Champhai leh Hnahlan chhehvelah chhungkaw tam takin grape an ching a, wine siamin, eizawn nan an hmang mek tih kan hria a. Kohhran pawhin sacramental wine atan a hmang tih kan lo hria a. Hetih lai hian wine hralh chhuah chungchangah harsatna an tawk hi PC Party chuan pawi kan a ti hle.
3. Champhai leh Hnahlan Winery-a wine siam te hi Mizoram chhung leh pawnah fel leh awmze nei taka dan hnuaia zawrh a nih theih nan Mizoram sawrkar chu Wine Rules siam a, hmang turin kan phut a ni.
4. PC Party chuan Champhai leh Hnahlana grape chingtute hmakhawngaiin, duhsakna nen a thlir a, kuthnathawkten an thawhrim rah aṭanga hlawkna an lo hmuh ve theihna turin an wine siam chu Mizoram chhunga hralh chungchangah harsatna siam lo turin Mizoram sawrkar kan ngenin kan phut tlat a ni.
