Inrinni khan Electric Veng Unit II MNF Unit Political Training chu BS Farm, Falkland-ah neih a ni a. He hun hi Pu Lalruatkima, Minister leh Pu C. Lalmuanpuia bialtu MLA-in an hmanpui.
Pu Lalruatkima MNF Adviser chuan thusawiin, “MNF hi he hnam lungphum, hnam thuthlung kengtu kan ni. MNF chu Party dang ang kan ni lo a, Pathian leh kan ram tan titu kan ni. Mizo hnam a awm chhung chu MNF a awm ang. Kan ram, kan hnam, kan sakhua a him theihna turin MNF hi din a ni a, Pathian thuah kan innghat tlat a ni. BJP, Congress leh ZPM ten an neih ve loh innghahna kan nei a, Pathian leh nationalism-ah kan innghat tlat a ni. Ram hrang hranga Zohnathlak ṭhendarha awm zawng zawngte nen lama an lenna party kan ni. He ramah hian Zofate kan la insuihkhawm leh ang,” a ti.
MNF Adviser chuan, “SEDP malsawmna sem ṭan chhoh mek a ni a, he malsawmna hi a mamawhtuten kan chan za tur malsawmna a ni,” a ti a. “Sorkar flagship programme tihlawhtling tur hian theih tawp kan chhuah a ṭul a. Sem hmasaka chang ve rih lote pawh kan awm ang a, nakum lamah pawh sem chhunzawm leh zel tur a ni ang. A dawng awm takin he malsawmna hi an dawn a pawimawh a ni,” a ti bawk.
Pu Lalruatkima chuan MNF sorkar hnuaiah kawng a ṭha ta hle tih a sawi a. “Ration buhfai leh gas kan hnianghnar a, nitin mamawh kan hnianghnar a, ramri humhalh thuah te sorkar-in a thawk ṭha hle. Kan ram chhe ta vek anga zirtirna dik lo awm mek hi a pawi hle. Kan sakhaw hruaitute, kan NGO hruaitute, kan politician te hi an ṭha asin. Chhe vek anga kan ram kan chhuah fo mai hi zirtirna dik lo a ni,” a ti a. “Pu Zoramthanga sorkar, hun harsaa ram hruai tlaka Pathianin a ruat hi hun lawmawmah pawh Pathianin he ram hruai tur hian a dah leh ang. Chuvangin, 2023 inthlanah pawh hian Pathian leh mipui zarah MNF chuan sorkarna a chang leh ngei ang. Chumi hunah chuan malsawmna nasa zawk mipuite’n kan chang za ngei ang,” a ti bawk.
Pu C Lalmuanpuia, bialtu MLA, Adviser MNF General Hqrs pawhin thusawiin, Covid hripuiin min tibuai chung pawhin nasa takin sorkar-in hna a thawk tih a sawi a. “Covid vangin kan buai a, ramri-ah kan buai a, Myanmar raltlan vangin kan buai a, vawk hri vangin kan buai bawk a ni. Dam khawchhuah kan khel a, kan dam khawchhuak ta mek a. Kan CM leh Minister te leh he sorkar tan hian kawl thar a eng ṭan mek a ni. Inthlan lehah hian kan sorkar leh ngei ka ring a. Tun term-ah hian kan duhthusam kan thleng chiah lo a nih pawhin a term lehah chuan kan beisei ang tak a thlen tawh ngei ka ring,” a ti.
