Sorkar-in Grape chingtute harsatna sutkian a tum

Aizawl June 6 : Excise & Narcotics department changtu Dr K Beichhua chuan Mizoram Liquor (Prohibition) Act, 20l9 hnuaiah alcohol hrim hrim Mizoram-ah phal loh a ni a, grape chingtu kut hnathawktute harsatna tawh mek sutkian dan tur dapchhuah hi sorkar duh dan a nih thu a sawi.
Excise Minister hian District Veterinary Hospital, Kolasib a kar liamta zirtawpni a a hawnna ah chanchinbu mi thenkhat ten minister hi an lo kawm a, minister chuan March 28, 2019 khan Mizoram Liqour Prohibition Act pass a nih thu leh rules puahchah zui leh a nih thu a sawi a, “Rules hi January 2020 ah Governor pawmpui tura thawn turin peih tawh,” a ti.
Draft rule siam hmasakah hian wine siam te, pawn lama beer zawrhchhawn theihna turte telh a nih laiin a lo ‘leak-out’ niin a sawi a, “Tualchhung chanchinbu lamah MNF sorkarin zu a zuar dawn tiin a darh a ni,” a ti. “Hetiang a nih takah hian fimkhur taka kal a ngai niin kan hria a, a zau thei ang bera in rawn a tha tiin cabinet-ah draft rule chu put luh a ni. Cabinet chuan study committee dinin anni hian uluk takin zir se, a zau thei ang berin consultation pawh lo nei se a ti a, he committee-ah hian deputy chief minister hi chairman niin kei hi vice chairman ka ni,” a ti a. Member-ah pawh Central YMA, MHIP, MKHC te ruat an nih bakah minister lamah pawh Lalchhandama Ralte te, Lalruatkima te, TJ Lalnuntluanga te leh Dr Thiamsanga te chu ex-officio atan ruat an nih thu a sawi.
“Kan Act ah chuan zu hrim hrim, alcohol hrim hrim phal loh ni mahse kut hnathawktute grape chungchangah MNF hunlaia nasa taka hma lakna a ni a, harsatna an tawh hi tha kan ti lo,” a ti a, consultation neih niin kohhran lam chuan zu zawrh tha an tih loh laiin grape wine chungchangah chuan meeting neia a hranpaa ngaihtuah an nih loh thu an sawi a, ngaihdan an sawi thei mai loh thu an thlen a ni.
Central YMA erawh chuan 5% alcohol tel wine chu rem an tih loh thu an sawi a, “Khatia a nih takah chuan draft rules kha cabinet-ah kan thlen leh a, cabinet chuan tun dinhmunah wine hi rules-ah chuan telh lo ang u tih kha kan thutlukna a ni,” a ti. “Chutih rualin wine hi kan khap lo tihna ni lovin alcohol kha chu khap hmiah a ni. Eng percent pawh nise,” a ti bawk.
Grape chingtu kut hnathawktute harsatna tawh loh dan tur pawh ngaihtuah a nih thu a sawi a, “An hmalakna hi engtinnge an chhunzawm zel theih ang tih chu uluk taka ngaihtuahna nen, harsatna an neihlohna turin kawng dap chhuahsak hi chu sorkarin an duh a ni,” a ti bawk. “Sacrament wine chungchangah chanchinbu mite zawhna chhangin minister chuan, “Helai hi a bik takin a changtu minister tan phei chuana buaithlak khawp mai. Kan mimal ngaihdan leh pawl anga kan ngaihdan hi a in ang tawh thin lova, chuvangin hengte pawh hi la en that leh turah ka rilru chuan a ngai,” a ti.
Tunhnaia Aizawl Millenium Centre, Dawrpuiah Champwine man a nih chungchangah excise minister chuan, “Tawngtaimi thenkhatin Aizawl Dawrpui lunlai takah zu leh ruihtheih thil a hluar thu chief minister hnenah an thlen a, chief minister chuan instruction min lo pe a, Grape wine man tuma kal pawh kan ni lo, grape wine zuartuten ualau takin an lo zuar a, a phenah beer, whiskey leh Korean wine te tam tak man tur a awm,” a ti. Grape wine dawr atanga zu man zat hi a sawi mai thei lo tih a sawi a, “A vaia man kha kan tihtur dik tak a ni tlat,” tiin Champhai wine chauh chu nise in hriatthiam dan a awm dawn tih a sawi a, “Dan ah phal loh ni mahse heti thleng kan in hrethiam alawm, a inziak lo lamah ngaihhnathiamna nen tun hi kan thleng tawh a ni,” a ti bawk.