CADC CEM atan Buddha Lila Chakma la lut

Aizawl June 9 : 10th Chakma Autonomous District Council, Chief Executive Member atan Buddha Lila Chakma chu Lawngtlai Bawrhsap, Amol Srivastava’n rinawmna thu tiam tirin a la lut.
May ni 9 2022 a, Chakma Autonomous District Council Budget Session neihah CEM Rashik Mohan Chakma chu rintawk lohna motion pu lutin paihthlak niin, term khat chhunga CEM 5na ni turin vawiin khan Buddha Lila Chakma chu lakluh a ni. 10th CADC hi kum 2018 ah in thlanna neiin CEM hmasa ber, Santi Jiban Chakma chu Rashik Mohan Chakma hian a thlak a, a hnu reilo teah Durjya Dhan Chakma in thlak lehin Rashik Mohan Chakma hian a thlak nawn leh a, hun reilote chhung rorelna fawng vuanin Budhha Lila hian a thlak leh ta a ni.
CEM thar Buddha Lila Chakma hi 13 Vaseitlang MDC Constituency atang thlantlin niin, CEM nihna te, Chairman leh Executive Member te pawh lo ni tawh a ni a, CADC ah hian CEM tum hnih a nihna tur a ni. CEM atana lak luh thar Buddha Lila Chakma chuan hruaitu hmasa te zahna chibai a buka, sawrkarna tha taka kalpui an tum thu sawiin, hna thawhna tur Budget siam a nih angin eirukna awmlova hma kan sawn theihnan hmalak a ni ang a ti.
CADC ah hian rorellai MNF party chuan member 20 neiin MDC zawng zawng hi MNF vek an ni a, tun term chhungah hian CEM tum li pahthlak a ni tawh a, vawiin a CEM lakluh hi tun Sorkar chhunga CEM lakluh tum ngana a ni.