Thalaiten Mizoram chhung Luidung tawp leh tihchhiat veiawm an ti

Youth for Environment Justice Mizoram (YEJM) chuan vawiin khan Aizawl Press Club-ah chanchinthar lakhawmtute kawmin, pawl (organisation) an nih loh thu leh Mizoram environment tluchhe mek siam tha tura mithahnemngai intelkhawm an nih thu leh khaw hrang hrang thalai pawlte nen an inthlunzawm thu an sawi a. Convener pali leh spokesperson pakhatin a kaihhruai an nih thu an sawi.
Romalsawma (Roma) tun hnaia Zobawk atanga Bairabi thlenga Tlawnglui zawhchhuaktu chuan, Tlawng lui a zawh chungchanga a thil hmuh thenkhatte sawiin, “Mizoram lui dungte kan ti bawlhlawh tawh lutuk a, mi tam takin en eizawnna an hloh mek a. A bikin Tlawng luia eizawng mi harsa ve te te an tam a, heng Chengkawl khawrh leh Lui sangha mana eizawngtu mi thahnem takte chuan an eizawnna an bansan a ngai tan ta a. Tlawng luia Balu la thinte pawhin Balu chu hman tlak mumal a awm tawh loh thu an sawi a ni,” a ti a. Tlawnglui a zawh lai pawh hian Balu phurh tum motor engemaw zat dingin, Balu pawh a in chhek vum viau a, mahse Baku phurh tlak mumal a awm loh thu a sawi bawk.
YEJM Spokesperson Lalrinfela pawhin thusawiin, “Kan lo neih kalphung leh kan ramngaw leh nungcha, tuihna, luite leh lui lian te dimdawi nachang kan hriat loh vanga kan ecosystem chhe tawh em em chu- National Highway Infrastructure Development Corporation Limited (NHIDCL)-in Mizoram hmun hrang hranga kawng an laihin a tihchhiat belh nasa hle a; Youth for Environment Justice Mizoram (YEJM) ten siamthat a tuam dam leh a nih theih nan theihtawp chhuaha hma kan lak mek laiin, NHIDCL Executive Director, Virendra Jakhar chuan Pi Vanramchhuangi aka Ruatfela Nu, YEJM Convener chu inbiak puiah a sawm a. YEJM te chuan hmasawnna kan duh a, kan environment humhim kan duh bawk tih bak sawipui tur kan nei lo tih tunah hian Press mite kaltlangin kan hriattir a ni,” a ti.
“YEJM ten PCCF-in kan thil phut a tihhlawhtlin nghal avangin lawm takin kan silent strike tihtawp a nih nghal thu thuchhuah kan siam a. NHIDCL hnathawh kan thlithlai reng dawn thua kan khahchilh angin NH-54 leh NH-06-ah an hnathawhte kan en zui a. NHIDCL te chuan hmun thenkhatah an hnathawh chhunzawm luiin an leivung pawh kan luiah an la paih zel tih kan hmu a. NHIDCL hian environment humhalhna dante leh ram leilung fate min zah lohzia an lantir zel a. Kawng an laih dawna tih ngei ngei ngai Environment Impact Assessment (EIA) pawh pakhat mah an la zawm lo zui zel a ni.
“Virendra Jakhar hian kan division Forest officer (DFO) te environment dan hrang hranga expert te hmuhdan report hi engah mah a ngai lo nge dawtsawiah a puh? Virendra Jakhar hian kan lui tuite NHIDCL kawng laih vungin a tihbawlhhlawh leh fur leh thala kan lui tui awmdan hre hlek loin, thiamchan tum avanga hetianga dawt chiang lutuk a sawi hi a ram leilung fa, NHIDCL kawng laih vung dan loa an thehthang vanga chhiatna namen lo tuar mektu leh kan thlah lo la awm zel turte thlenga a zah lohnaah kan ngai a. Kan environment leh ram leilung fate zahpah lo taka tawngkam a chhakchhuah hi a siam tha leh a nih loh chuan eng tikah mah kan ngaidam thei lo ang.
“Virendra Jakhar-a’n kawng laihna hmun hrang hrang 138-a leivung an paihte chu Deputy Commissioner phalna veka paih an nih thu a sawi bawk a. DC te hian phalna an pe a nih chuan a mawh an phur tur a ni ang a. NHIDCL executive director hian DC te hi dawta a puh a nih chuan Mizo mipuite hi DC te thlavang hauhin an hmaah kan ding ang.
“Mizo mipuite hnenah tangka suma kan ram leilung leh a hausakna pi leh pu chena kan lo hnianghnar pui tawh hralh lo turin kan ngen a. Kan thlahtu ten an thlah kal zelte tana dimdawi taka an lo enkawl a, min lo humhim sak hi kan thlah lo awm zel turte tana chenna tlak a nih theih nan kan ram hi National Highway Infrastructure Development Corporation Limited (NHIDCL) ten an tihchhiat mek humhim turin kan thisen far tawp thlengin kan bei dawn a. NHIDCL te hnena tangka sum dil in lo awm a nih chuan ram leh hnam phatsantuah kan puh dawn che u a ni. Mizoram hi kan ram a ni a, Hei lo hi ram dang kan nei lo. Kan ram neihchhun hi keimahni’n kan humhalh loh chuan tuman mi humhalh sak dawn si lo a a ni,” a ti bawk.