Tukin zing khan YMA Day 2022 lawmnan R.Lalngheta, Central YMA President chuan Central YMA Office tualah YMA flag a pawt parh.
YMA flag pawh parh a nih hnu hian Conference hall ah inkhawm tawi buatsaih a ni a. He hunah hian tun hnaia Tlawnglui humhalhna nipah fawm a, Zobawk atanga Bairabi thleng Tlawnglui zawh chhuaktu Romalsawma, Mission Vengthlang chu Central YMA leh AMC ten chawimawina an hlan bawk bawk.
Central YMA president R.Lalngheta chuan thusawiin, YMA Day 87-na kumina branch hrang hrang ten an lawm danah lawmthu a sawi a. “YMA chu pawl ropui, Mizote zawng zawng huap a ni a, hetih lai hian hruaitute’n tlin lohna tam tak kan nei a. Sawiselna pawh kan dawng thin a, insiam thatna tur pawh tam tak kan nei tih kan inhria a. Kan tlin lohnaah min dawm a, YMA chu pawl ropui tak a nih zel theihnan Mizo mipuite tan la turin ka sawm a ni,” tiin Mizo mipui tam takte tlan ber Tlawnglui a thianghlim theih nana Romalsawma inpekna chu fakawm a tih thu sawiin, Tlawnglui humhalh tur hian AMC te nen pawh tan lak an tum thu a sawi.
Aizawl Municipal Corporation Mayor Lalrinenga Sailo pawhin thusawiin, “Khawpui thang zelah bawlhhlawh pawh thang ve zelin, hei hian mipuite tlan ber Tlawnglui luh pawh hlauhthawn awmaha dah ta mek a. Heng kan harsatna te hi kan insiam chawp a ni a. Zofa te harsatna hi Zofate hian kan chingfel tur a ni,” a ti a. Tlawnglui humhalhna tur atana YMA nena thawhhona tur thuthlung siam mek pawh a hlawhtlin vat a beisei thu sawiin, leivung paihna tura ruahmanna siam leh project te pawh a hlawhtlin vat a beisei thu a sawi bawk.
