“Mizoram sawrkârin Mizoram State Health Care Scheme sum indaih lohna phuhrûkna tura Asian Development Bank aṭanga loan cheng nuai 1,000/- puk a tum hi, Chief Minister Pu Zoramthanga opposition-ah a awm lai a NLUP chungchânga congress sawrkâr a kahna, ‘Bang chhak lam sahthlâk a, bang thlang lama bel ang’, a tih nen khan thuhmun rengah kan ngai a, sum enkawl chungchângah MNF sawrkâr hi Congress sawrkâr ang chiah khan an hlawhchham a ni,” tiin vawiin khan ZPM thalai chuan thuchhuah an siam.
Thuchhuahah chuan, “Chief Minister-in Assembly House chhûngah meuh, a dam lo apiângin an hman tur cheng nuai 2 thlenga dahsa a nih thu a sawi tawh hnuah pawh, health care sum ba tâng cheng vaibelchhe 70 chuâng a awm leh cheng tam tak pûk ngaia an awm hi mak kan ti a, a damlo apiangin an hman tur atana ruahman sa cheng nuai 2 ṭheuh kha kan Chief Minister zahawm tak hian bang chhak lam sahthlâk a, bang thlang lam belna atân a hmang ta mai em ni? tih hi kan zawhna a ni,” an ti bawk.
