Lalrinenga Sailo, Aizawl Mayor chuan vawiin khan Aizawl khawpui chhunga Local Council Chairman leh Secretary zawng zawngte AMC Auditorium, Thuampuiah a ko khawm a. Aizawl khawpui hmasawnna kawnga hmalak dan tur a sawipui.
Aizawl Mayor Pu Lalrinenga Sailo chuan, “Local Council hi AMC hnuaia awm a ni a, chuvangin department dangin an chhawr dawn a nih chuan AMC phalna an neih hmasak a ngai a ni”, a ti a. Mayor chuan mi changkang leh mi fing apiangin bawlhhlawh an lo ngaimawh tih a sawi a. Khawvel changkang zawkte entawnin India ram pawhin faina kawngah ke kan pen mek thu a sawi bawk. Aizawlah hian lei laih kaihhnawihah nunna tamtak kan lo chan tawh a, in leh lo tam tak a lo chhe tawh bawk a; chuvangin sawiselna leh dodalna nasa tak karah AMC in lei laih khuahkhirh dan hi Aizawl mipuite himna atan a keng kawh ta a ni a ti.
Keynote address Pu Zothanmawia, Municipal Commissioner hnen atangin ngaihthlak a ni a. Commissioner chuan “Local Council chu Aizawl mipui tana hmalak kawnga a sulsutu ber an ni a, AMC hmalakna kawngah pawh an tangkai hle a ni” a ti.
Meeting hi session hnih (2) ah then in, session hnihna hi interactive session atan hman a ni. Session hnihnaah hian AMC Official-te atangin AMC hmalakna leh ruahmannate ngaihthlak a ni a. Pu C. Lalmuanawma, Town Planner hnen atangin Parking chungchangte, Bawlhlawh sawngbawl dan leh leivung chungchanga AMC hmalakna leh ruahmanna te a sawi a. Pu H. Lalhmingthanga, Joint Municipal Commissioner hnen atangin Ran khuahkhirh chungchang leh Single Use Plastic chungchang a AMC hmalakna kal mekte a tarlang bawk.
Meeting hi Pu H. Lalhmingthanga, Joint Municipal Commissioner in a kaihruai a.Pu Laltlanzova Khiangte, Executive Councillor (i/c Solid Waste Management) leh Pu H. Zonunsanga, Executive Councillor (i/c Sanitation) ten thu an sawi bawk.
Aizawl khawpui hmasawn zelna tura Aizawl Municipal Corporation hmalak mek leh hmalak tur hrang hrangte sawihoin – leivung paih chungchangte, ran khuahkhirh chungchangte, Single Use Plastic (SUP) khap chungchangte, bawlhhlawh senghawi leh sawngbawl chungchangte, vehicle parking chungchangahte chak zawk leh awmze nei zawka hmalak chhunzawm dan tur sawiho a ni.
Meeting-ah hian Aizawl khawpui chhunga Local Council aiawh te an tel kim hle a. Aizawl khawpui chhungah hian local council 83 awmin member 708 an awm mek a ni.
