Congress Bhavan Golden Hall-ah nimin khan MPCC chuan Zirtawpni Party Chhung Inkhawm, Political Session programme a hmang a.
Lalsawta, President MPCC chuan thusawiin, May thla chhunga Congress Party Tomir Fehchhuah huna feh chhuak zawng zawngte leh lo dawngsawngtu zawng zawngte chungah lawmthu sawiin, pawisa leh hlawkna engmah nei lo, inpekna leh insengso te thawhrim rah chu pawisa leh mahni ropuina atan a ni lova, a hlawkna chu ram leh mipuiin an tel anga, ram tana thil tha ti a kan thawk thei hi hlawh ropui tak a ni, a ti.
Congress party-ah danglamna nasa tak a thlen thu sawiin, Pu Lalsawta chuan, sawi loh anga nung lovin kan nundanin i tlangau ang u. Thingtlanga kan unaute, kan unit leh block te rinawm takin, chhel takin ram tan nghet takin an ding tih hria ila. Keini lo hi Zoram chhanchhuak turin mipuiin rin an neilo niin ka hria, a ti.
Pu Lalsawta chuan, khawvel thar, Technology khawvelah kan cheng tawh a. Hetiang khawvelah hian Politics pawh tunhmaa politics kan hriat ang kha mipuiin an khawpkham tawh lo.
MLA candidate chungchang sawiin Pu Lalsawta chuan, bial tam takah kan miten phur takin anmahni ngaihsaktu bik neih an duh a, chungte nena hmalak an chak tih kan hria. Mahse, Mizoram tan, politics tha leh dik inzirtir kan mamawh avang leh Congress party chu Committee hmanga kal kan nih avangin Committee thu anga bial vil leh vil loh chungchang rel a ni. A hun takah Mizoram leh bial tana mi tha Pathianin min pe ang, hei hi kan ring ngam a ni, a ti.
Pu Lalsawta chuan, ram leh hnam tana sorkar tha siam tura thawhhona tha leh inngeih tlang taka kal a pawimawh zia sawiin, kan chanchin theuh a chhe lam aia a tha lam kan hmuh sak leh insawi sak a, kan inrintawn a, midang rin ngam nih pawh a ngai a ni. Hotute leh thawhpuite pawh mi famkim leh mi tha tluan kan awm bik loh vek avangin kan phu tawk ang zela thain,kan chanchin tha theuh insawi sak ang u, a ti a. Congress party-ah danglamna thleng avangin Mizoram mipuiin beiseina an nei sang zel tih sawiin, Keini ho hi mipui rin leh innghahna kan nih zel a ngai. Kan ram hi a chhiat zel lohna turin keini hi dik tak leh chhel taka kan thawh ṭang ṭang a ngai a ni. Kan kep tur te tan theihtawpin i inpe leh zual ang u, a ti bawk.
