Mizo National Front Media & Publicity Deptt. chuan thuchhuah siamin ADB loan sum tam tham tak sorkarin lak a tum chungchang ah eptu party thenkhatten thu dik lo hmanga mipui rilru hruaikawi tumin, ‘Bang chhak sahthlaka bang thlang pin nana hman,’ tia sawi hnawmna tur an zawng reng mai hi MNF chuan tha a tih loh thu an thuchhuah ah an tarlang.
MNF party thuchhuah tarlan danin Mizoram State Health Care Scheme (MSHCS) tihchangtlun zelna atan Mizoram sorkar chuan harsatna tam tak karah Asian Development Bank (ADB) Loan Rs vbc 1004.70 la tura a bawhzuinaah Screening Committee (Union Finance Ministry) chuan a pawm tawh a. Loan hi Funding Agency – ADB chuan Rs vbc 803.76 (80%) a pe chhuak ang a, a bak Rs vbc 200.94 (20%) chu Mizoram sorkar tum ve tur a ni.
ADB Loan puk tur Rs vbc 803.76 hi External Aided Project (EAP) hnuaia kal tur a ni a, EAP guidelines angin Central sorkarin 90% – Rs vbc 723.38 atangin a rul ang a. Loan puktu Mizoram Sorkarin 10% – Rs vbc 80.38 atangin a rul thung ang. A awmzia chu Mizoram Sorkarin ADB Loan a puk tur zat chu Rs vbc 80.3 chauh tihna a ni. Loan punna hi 2% p.a. vel ni tura ngaih a ni a. Loan rulh hun chhung hi kum 15 vel tur a ni bawk ang.
ADB Loan, EAP hnuaia umchhuak tur hian harsatna tam tak paltlang a ni a. A tirah DoNER-in a hnawl a, Department of Expenditure, Ministry of Finance-in a hnawl leh a. Kan Chief Minister Pu Zoramthanga leh Health Minister Dr. R. Lalthangliana-te hmalaknain Department of Economic Affairs, Ministry of Finance dawr leh a ni a. Theihtawpa beihzui a nih hnuah Screening Committee, Ministry of Finance chuan a pawm thei ta a ni.
ADB loan lak tura hmachhawp mek hi MSHCS Corpus Fund (sum bawmpui)-a dah tur a ni a. Mizoram healthcare bill-te chu Corpus Fund peipunna pung (interest) atanga pekchhuah thin a ni. Corpus Fund-te hi Bank hrang hrang – MRB (Branch 7), Apex Bank (Branch 3), MUCO (Branch 2) leh Yes Bank (Branch 1)-ah dah a ni a. Tun dinhmunah hian Corpus Fund Rs vbc 205.67 a la awm mek a, ADB Loan tihfel a nih hunah chuan Corpus Fund Rs vbc 1210.37 awm tura beisei a ni a, MSHCS chu tluang takin a kal chho zel thei dawn niin an thuchhuah ah an tarlang a ni.
