CM hovin State Disaster Management Authority thukhawm

Aizawl, June 21 : State Disaster Management Authority (SDMA) chu an chairman Chief Minister Zoramthanga hovin vawiin khan CM Conference Hall-ah thu pawimawh ngaihtuahin an thukhawm.
Meeting-ah hian fur ruahtui avanga Mizoram hmun hrang hranga chhiatna thleng te thlirhovin hma lakna kal mekte sawiho a ni a. Chhiatna tawkte a tuarpui thu sawiin, Chief Minister chuan SDRF atanga tanpuina pek turte pawh a rang thei ang bera pek a nih nan hma la thuai turin a hrilh.
African Swine Fever avanga farmer thahnem takin harsatna an tawh leh hemi kawnga hmalakna kal mekte leh tih belh ngai la awmte sawiho a ni bawk. Heng bakah hian fur hmachhawn dan chungchanga ruahmanna neih tawh dan DC/ District Disaster Management Authority theuh a hmalak mek dan te report ngaihthlak a ni a. AApda Mitra Scheme – NDMA hnuaia chhiatrupna hmachhawn leh chetlak dan chungchanga volunteer te zirtirna scheme chungchang report ni bawkin, Aizawl atanga volunteer 200 train chhuah an nih hnu ah Lunglei, Champhai, Mamit, kKolasib leh Serchhip district-te chu telh leh a nih thu te, chung atang chuan Mamit district atangin volunteer 100 te training pek an nih tawh thu ngaihthlak a ni. Heng bakah hian SDRF inkaihhruaina thar chungchangte, Hunthar, Aizawl a Landslide Risk Mitigation Scheme (LRMS) kalpui chungchang te, COVID-19 hrileng chungchangah boruak a zira kaihhruaina ennawn a nih zel dan leh tun din hmunah hlauhthawnawm khawpa case pung a la awm loh thu te ngaihthlak a ni a.