CTI Sesawng, 27/6/2022: Vawiin chhun dar 2.00 khan CTI Sesawngah Mizoram Pradesh Youth Congress Committee (MPYCC) chuan Martarte Lungphun kum 25-na Silver Jubilee lawmna hun a hmang a, he Martare Lungphun hi June ni 27, 1997 khan a hun laia Chief Minister Pu Lal Thanhawla’n a hawng a ni. Martarte Lungphun hi Mizoram rambuai kum 1966-86 chhunga Mizo fa nunna chan tate tana lungphun siam hmasak ber a ni a, tunah hian Lungphunah hian hming 1168 a chuang mek a, kum 2014 khan Sergeant Lalduha ruhro phum a lo ni tawh bawk.
MPYCC President hlui leh CLP Leader, MPCC Treasurer ni bawk Pu Zodintluanga Ralte, MLA chuan Martharte Lungphun kum 25-na lawmnaah hian thu sawiin, “Mizoramah rambuai tah leh hathialnaah kan rum a, Congress party zarah remna leh muanna kan nei ta a, kan sawi duhte sawi ngam kan nih takah chuan ram tana nunna chan tate ngaihthah an ni kha MPYCC rilru a na em em a, kan ‘debate’ nasa a ni. MNF sorkar, a ti tur bera kan ngaihin an sorkar lai pawha an ngaihsak loh avangin, kan hotute lal thutthleng kian thei an ni tiin he Martarte Lungphun pawh hi kan tih turah ngaiin kan ti ta a ni,” a ti.
“Aizawl tlak lamah mipui atanga nawrna (pressure) nasa tak karah thinlung tak taka tih ni lo, Martarte thlan an siam ve leh hnuhnawh a ni,” tiin Pu Zodintluanga chuan MNF ten Martarte an ngaihthah rei thu a sawi.
CTI Sesawnga MPYCC ten Martarte Lungphun an dintirh tuma President, Pu John Rotluangliana chuan Martarte Lungphun chu an thihna hmun hriat tawh loh, an ruang phumna hriat tawh lohte tan thlan tak taka ngaitu an tam hle tih a sawi a, “MNF rawn haw khan ruhro te an lo hawn a, an han sorkar a, an ngaihsak zui hauh lo a ni. He lungphun hlu tak kan hawn ni khan Martar chhungte an rawn kal a, an rawn tap nasa a ni. Thlan hmun nei loa thite chhungten an thlanah an ngai thlap a ni,” a ti a ni.
Pu John Rotluangliana chuan mahni lam insiam fel a tul thu sawiin, “Politics kalphung dik tak chu thalai atanga lo kal hi a ni a. Keini kan party pawh hi kan that ve hun te, mipuiin min ngaih let hunah kan ding chhuak ang,” a ti bawk.
MPYCC President Dr. Lalmalsawma’n thu sawiin, Congress party chu mitin huapzo party a nih avangin Martarte Lungphun pawh a siam hmasatu a nih thu a sawi a, “Kan party hotute kha remna leh muanna hlut zia hretu an ni a, lal thutthleng kian thei kan ni a, chuvangin Martar chhungte pawhin ngaihsak an hlawh a ni. Mi tin huanpzo party kan ni a, hei vang hian Martarte Lungphun te pawh siam kan ni,” a ti.
Congress Thalai President Dr. Lalmalsawma chuan haw haw leh buaina siam tum vanga sorkar nawr thin an nih loh thu a sawi a, “Keini hi haw haw mai mai kan ni lo, kan sorkar kal dik lohna nasa tak mipuiin kan tawrh nasat avanga sorkar hi nawr kan ni a, mipui tan kan nawr zel ang,” a ti a ni. President hlui Pu Albert Lalthlamuana leh Pi Vanlalawmpuii Chawngthu ten thu an sawi bakah hruaitu hluiten thu an sawi bawk.
Martarte Lungphun Silver Jubilee lawmna Programme ah hian MPYCC Presiden leh President lo ni tawhte chuan Martarte hriatrengna leh zahna lantir nan Lungphunah pangpar an dah a, MPYCC mai bakah Congress Party mi thahnem tawk takin Silver Jubilee hi lawmin, tlaiah ruai theh a ni.
