Cachar phai tuilian in Mizoram chak lakluhna kawngpui NH 306 a chim avangin hun engemawchen Mizoram nitin mamawh lakluh a khaihlak hnuin, tun dinhmunah chuan Silchar leh a chhehvel a tuilian chuan kam lam a pan hret hreta, vairengte Police hotu te hnen atanga thu dawn danin, tuilian hi motor tana kal harsa khawpin harsatna a awm tawh lova, hetihlai hian Tuilian in kawngpui a tihchhiat nasat avangin lirthei kal vel erawh a la harsa hle a ni.
Thu dawn danin Silchar bul Sonabaghat a kawng chhia pawh Assam sorkarin vawiin hian a siam that hna thawkin motor pawh tlem tlemin kaltir anni.
Vairengte police checkgate a chhinchhiah danin nimin zing atanga vawiin zing dar 8 thleng khan motor lian 54, motor laihawl 23, motor te 32, Sumo 5, Gas phur 5 leh Oil phur 3, a vaiin motor 122 a lo lut ani.
Hetihlai hian mizoram sorkar leh central yma hmalakna in vawiin khan tuilian tuar te tanpui nan vairengte atangin Tank lorry hmangin tui thianghlim thahnemtak pein an kal a, nizan lan khan PHE dept in tui thahnemtak an lo zuk pe tawh bawk.
