June 27, 2022 zan khan MVA OB 2022-2025 charge inhlanna chu President kal chhuak tûr Er. H. Lalzirliana, MLA inah neih a ni a. He hun hi Pu Zira’n kaihruaiin Post tinah charge inhlan nghal a ni.
MVA President kalchhuak ta Er. H. Lalzirliana, MLA chuan MVA te kal zelna turah duhsakna sâng ber a hlan a; chêng ₹ 20,000/- MVA President Dr. Mala hnenah a hlân bawk. MVA General Secretary, Pu Puitea hnenah bag nalh tak MVA GS bag tûr a hlan bawk a, a chungah MVA hruaitute an lawm hle a ni.
President thar Dr. Lalmalsawma Nghaka’n thu sawiin; “President kal chhuak tain pâwl min hruai dan ka thlir hian pa fel tak leh a bial mipui tana MLA tling zo tak a ni tih a lang a, lawmthu ka hrilh a ni, a ti a. Min ngaihhruina atan pawisa ₹ 20000/- (Sing hnih) lâi min pâi avangin lawmthu ka sawi a ni, a ti bawk. MVA te min kalsan lo a, hauh kan ṭulna leh fuih kan ngaih naa min fuih zel turin ka sawm nghal bawk a ni,” a ti a. A hriselna lo ṭha zelin Mizoram Volleyball pa ni zel tûrin ka sawm nghal bawk a ni, a ti bawk.
MVA President kal chhuak Er. H. Lalzirliana, MLA chuan thusawiin, tuna thil thlen dan hi ṭha ka ti hle a ni, a ti a. Kan hruaitu tharte pawh a hmaa theihtawp chhuah ṭhin tute tho kha in ni a, in ṭha tawk tih ka hria a; ka chawlh avanga ral ban mai ka tum lo a, theihtawpa rawn thawh zel ka tum a ni, a ti a. Harsatna in nei a nih pawhin rawn sawi zel ula, ka phak tawk sâng bera hma lakpui zel che u ka inhuam a ni, a ti bawk.
Tin, June 28, 2022 hian MVA hruaitu tharte hian Sports Minister Pu Robert Romawia Royte chu a Office-ah hmuin inhmelhriatna neih a ni a. An duh leh ngen anga an thu thlen te rang taka bawhzui a nih tûr thu a lo hrilhin, Mizoram State Sports Council Engineer-te nen Volleyball khelhna hmun tûr enho nghal a ni a. Report-te siamin Sports Minister zarah Volleyball hmun ṭha tak an neih ngei an beisei tlat a ni.
Pu Robert-a hian Coach Refresher Course a rang lama nei tûrin lo inbuatsaih ula tiin MVA hruaitute thu a chah bawk a ni.
