Kum 2018 khan Congress sorkar leh TATA Trust te tangkawp chuan TATA Trust Football Academy, Centre of Excellence, Mualpui hmunah an din a. He Academy chhuak naupang zingah India Junior a tel engemaw zatah an awm tawh a. Bengaluru FC leh Athletico Madrid Academy zawm pawh an awm tawh bawk a ni.
MPCC chuan, “Hetiang khawpa Mizo naupangten an chhawr Academy hi kum 2024 thlenga thawhhona thuthlung siam ni siin MNF sorkarin a ngaihsak tha duh lo mai ni lovin TATA Trust hotute hnenah MNF sorkarin sum thahnem tak a dil avangin TATA Trust hotute lungawi lovin TATA Trust Academy Mualpui hi an ti tawp ta a ni,” an ti.
Vawiina thuchhuah a siamah MPCC chuan, “Mizo naupang tam takin hun reilote chhung pawha heti khawpa an chhawr tangkai nisi Mizoram sorkarin a ngaihsak loh avanga hetia a tawp leh ta mai hi Congress Party chuan a pawi a ti tak zet a. Sum leh pai ei theih tur zawnga Project lian pui pui siam ringawt ngaihtuah lova Mizo naupang infiam mite ngaihtuah zawk turin Congress Party chuan Sport Minister Pu Robert Romawia Royte hi kan ngen a ni,” tiin a tarlang.
