ASEP leh PYD ten thingphun hnatlang nei

Pentecostal Youth Department, Upper Republic leh ASEP General Headquarters, Aizawl te chuan vawiin khan Tanhril MZU road-ah Green Mizoram Awareness Campaign leh thingphun hnatlang an nei. He hunah hian Upper Republic PYD member te an thawk chhuak a, ASEP President K. Lalmuansanga chuan awareness campaign hun hmangin, thingphun pawimawhna leh thingphun dan zirtirna hun an hmang a ni.
Thingphun dawnah function tawi te hman a ni a, PYD Environment Protection Committee Chairman Zorema Pachuau chuan a kaihruai a. PYD member kalkhawmte zingah awareness campaign hman niin, ASEP President chuan, “PYD te hian kum 2009 vel atangin North East India huapin Environment Protection Committee a lo din tawh a. Chuta tang chuan hmuh theih khawpa hemi kawnga hmalakna hi a lo kalpui hi a lawmawm tak zet a. Environment humhalh hi Pathian thu nena inmil tak leh Kohhran thalaiten kan hmalakna awm tak a ni a, theihtawp chhuaha tan la zel turin PYD te ka chah mawlh mawlh a. Hei hi Pathian ringtu Kristian thalai kan nihna anga kan ram tana rawngbawlna pawimawh tak a ni,” a ti.
He thingphun hnatlangah hian EF&CC atanga lak thing tiak 30 phun a ni a, nung ngei turin thing phun chhun ang ang hi uluk taka phun leh enkawl zui tur a ni.