30th June 2022 Ningani. Nimin Dt 29.6.2022 Nilaini tlai khan Mizoram MP Pu K.Vanlalvena chuan NHIDCL Managing Director Pu Chandal Kumar leh General Manager ,Technical changtu Pu Ashok Kumar Jha te chu an office chamber Delhi ah a kawm.
Pu Vena chuan Mizoram hmun hrang hrang ah thlur engemawzat NHIDCL in Double Lane kawng an laih mek chu Mizoram hmasawnna leh Act East Policy atana tangkai tur a nih avangin NHIDCL hotute chungah lawmthu a sawi a.Hetih rual hian Mizoram hmun hrang hranga NHIDCL Hnuaia Contractor leh Sub-Contractor ten an hnathawh Work order in a phut anga hna thawk lo va an tana awlsam tur ringawt ngaihtuaha leivung an paih chu dan kalh a nih thu te,Mizoram chhunga forest leh environment te tihchhiat a nih nasat thu te,mi tamtak te thlai chinna leh lui te a tihchhiat nasat thu a thlen a.Mizoram chhunga Double lane laih mek heng Seling to Tuipang te,Zemabawk to Champhai te,Lunglei to Tlabung te hi Mizoram sawrkar enkawlna hnuaia dah lova NHIDCL hnuaia hna te hi thawh an nih avangin uluk zawka enkawl turin Pu Vena chuan NHIDCL hotute hi hmaichhanah a ngen a.Heng contractorte hi a rang thei ang bera Control an tul thu leh a tul dan anga action lak a tul thu NHIDCL hotute hnenah hian a thlen nghal a ni.NHIDCL hnuaia kawnglaih leivung paihin ram a tihchhiat te thlalak leh video te Pu Vena chuan NHIDCL hotute hi a hlan nghal bawk a ni.
MP Pu K.Vanlalvena chuan nikum October thlaa Minister,Road Transport changtu Pu Nitin Gadkari hnena a lo thlen tawh Mizoram chhim tawp kawng pui laih tur Mara Autonomous District chhunga Kawlchaw to Lawngmasu emaw Tuipang to Lawngmasu double lane road lai tura ngenna a lo thlen tawh chungchang a bawhzui nghal a.NHIDCL Managing Director Pu Chandal Kumar chuan Kawlchaw to Lawngmasu hi PMGSY road a awm avang in Zorinpui atanga Lawngmasu double lane road siam belh zawk tura ruahman a nih thu leh chu chuan Pu Vena rawt anga Chhimtuipui lui kam lawng kal theihna Mizoram chhim tawp khua Lawngmasu a thlen dawn tho avanga hrethiam tura a duh thu leh a beisei thu NHIDCL Managing Director chuan Pu Vena hnenah a sawi a.Hemi atan hian DPR an peih tawh thu leh KM 28 a thui a nih tur thu te,kumin 2022 December atanga thawh tan theih a beisei thu Pu Chandal Kumar chuan Mizoram MP Pu Vena chu a hrilh bawk a ni.
