Vawiin ni 05.07.2022 Thawhlehni hian Mizo Hnam Runah mi thar lawmluh program hman a ni a. MNF-a lawmluh thar hi Pu J. Malsawmzuala Vanchhawng, Zonet news editor thawk lai a ni a, amah lawmluttu MNF President leh Chief Minister Pu Zoramthanga chuan hnam thuthlung nei party-ah sengkhawm hna kalpui mek a nih thu a sawi.
MNF President chuan MNF lungphum leh thuthlung bulthum sawiin, “Kan thlahtu hmasaten Mizoram tlangram chheng chhia an lo luah chu Pathian remruat a ni,” a ti a. “Khawchhak atanga thlang tlain Bangladesh phaiah lo tawp ta se, muslim kan ni vek mai thei. Zoram ngawpuiah tawp lovin Manipur leh Assam tawlh thleng se budhhist leh muslim kan ni vek ang, a ti a. Mizote chu chanchintha hril tura humhim tlat kan ni.
“Mizoram chu mahni ramri (territorial integrity) nei a ni a. Tawng pakhat (common language) nei, Lehkhathiam tamna, Kristian za a za leh Pathian thlarauin harhtharna a pek ngun ber a ni. Khawchhak Mongoloid leh khawthlang Aryan inang lo lutuk leh inpawm tawn lo karah Mizote chu a laiah – khawi lam lamah pawhin chanchintha hril turin min pawm. Asia ram huapin thlir ila chanchintha hril turin Mizoram ang an awm lo. Pathianin danglam taka a dahte kan ni a, hei hi kan lungphum – Pathian leh kan ram tan tih lo intanna a ni,” a ti.
Pathian remruat dan sawiin, “MNF-in Independence a puan hma February ni 28, 1966 zan khan Assam Rifles kha la ta ila, tun hi kan thleng lo ang. Sum tam tak neiin Zoram kan awp ang, mahsela India thinrim nen kan inbei ang a, kan thi hnem ngawt. Tin, sum ngah avangin kan buai nasa hle ang. Pathianin a tawk tein min hruai zel zawk a. MNF-in harsatna a paltlang hi mimal anga kan tawrhna nasa viau mah se, movement avanga kan tawrhna a nasa zawk,” tiin Pakistan sipaite lak atanga an tlanchhuah dan (exodus day) a sawi.
MNF kal zel dan sawiin, “Inthlanah chak loh chang awm mah se, tunah chuan (2018) MLA – hmun thuma thena hmun hnih kan nei mek a ni. Leiba ngah tiin min bei a, loan Rs vbc 1000 lak kan tum mekah min sawisel thin. He loan hi India Sorkarin Rs vbc 720 min rulhsak dawn tih an hriat loh vang a ni,” a ti a. “Kan harsatnate hi Pathianin min sut tlang sak zel dawn,” a ti.
MNF President chuan Congress chu beih tham an awm tawh lo. Beih lutuk chi pawh an ni lo, an moral a down ang, a ti a. Kalphung thar tia kalphung thlak zing deuh an awm thute a sawi a. “MNF chu a tir atangin kalphung ngai rengin a la kal. “MNF atanga chhuakte chu a che fuh ngai lo. Hnam thuthlung kengtu kan nih tlat avang hian sengkhawm hna kan thawk mek a ni,” tiin thuthlung vuan tlat turin party mipuite a sawm a ni.
Lawmluh thar Pu J. Malsawmzuala Vanchhawng pawhin thu a sawi a. “Zalenna sualtu hnam hi ka ngaihlu tak zet a. MNF chu party tobul nghet nei, Mizo hnam a awm chhung chuan a awm ka ring. Nakum inthlanah pawh MNF tan tualto party dang beih tham an awm ka ring lo,” a ti bawk.
Inkhawm hi MNF Vice President Pu Vanlalzawma’n a kaihruai a, Pi Lalbiakdiki, Adviser-in hunserh a hmang a. Mi thar lawmluh inkhawmah hian mi thahnem tak an tel a ni.
