Vawiin Ni 5 July, 2022 (Thawhlehni) chawhnu dár 2.00 khan Central YMA chuan kumin 2022 a MBSE hnuaia HSLC leh HSSLC result chhuak a Mizo zirlai Top Ten a tlingte lawmpuina leh chawimawina hun an hmang.
Central YMA Hall, Tuikhuahtlanga Zirlai ti tha te lawmpuina leh chawimawina hun hi Pu Lalhmachhuana, Vice President, Central YMA chuan kaihruaiin, Prof Lalnundanga, Registrar, Mizoram University chuan Zirlai tithate fuihna thuchah tha tak a sawi a. Central YMA chuan zirlaite chu an thiamna leh theihnate ram leh hnam tan hmang zel turin duhsakna a hlan a ni.
Zirlai chawimawite hi HSLC atangin 14, HSSLC (Arts) atangin 10, HSSLC (Science) atangin 11 leh HSSLC (Commerce) atangin 11 niin an vaiin 46 an ni.
Central YMA tena Zirlai ti tha an chawimawina leh lawmpuina thilpek an pekte hi LB Associates, Bungkawn tena an sponsor a ni a, Central YMA chuan Dr. Lalbiakmawia Ngente, Managing Director, LB Associates te chungah lawmthu a sawi a. He programme hlawhtlin nana thawktu Central YMA hnuaia Education Sub-Committee leh Reception, Ushering leh Refreshment lam buaipuitu Bungkawn Branch YMA te chungah lawmthu a sawi bawk a ni.
