Aizawl July 7 : Nilaini khan MHIP Tuikual North Branch chuan Tuikual North YMA Hall-ah MHIP Day an hmang a. He hun hi Lalruatkima Minister, bialtu MLA ni bawk chuan a hmanpui a. Minister chuan, “Nupui pasal tlak, mawhphurhna la tlak, hnam dangte el ngam turin kan fate i chher hriam ang u,” a ti.
Lalruatkima chuan, “Kan Zoramah aia upa zahna a tlahniam ta mek niin a lang a. Thalai tam zawk mut hunah an meng a, thawh hunah an mu ta si a. Aia upa zahna te, Zonunmawi tlawmngaihna kan chawm nun thinte kha a par vul leh theih nan nute hian theih tawp chhuah thar leh ang u. Chu chuan kan tualzal nun hi a ti nuam leh ang,” a ti a. “Kan fate an talent leh a tuina zawng tak tuipuiin haichhuahpui ila, chu chuan nun kawng dikah a hruai ang tih ka ring a ni,” a ti.
Aizawl West II bialtu MLA chuan, “Aia upa zahnate hi kan tun din leh a ngai hle. Zonunmawi tlawmngaihna a bo chuan MHIP, YMA, MUP nih a nuam lo ang a, Mizo nih a nuam lovang. Hawh u nute hian bul i tan ang u. Fa nei tam turin kan fate fuih ila, fa kan neih tlem hian kan hnam kal zel turah harsatna min thlen dawn a. Kan death rate leh kan birth rate en hian kan hnam kal zel dan tur hi ngaihtuah tham tak a tling a ni,” a ti.
Lalruatkima chuan, “Foreign-a hnathawk tam zawk hi hmeichhia an ni a, passport buaipui tam zawk daih hmeichhia an ni. Dawrah kal ila, bazarah kal ila, sa sat chenin hmeichhia an tam zawk vek a ni. Khawnge mipate kan awm? Nute hian kan fa mipa te hi kan enkawl hriam tawk lo em ni aw, tiin ka ngaihtuah fo thin. Kan fate hriam lehzuala enkawl tur te, aia upa zahna leh Zonunmawi tlawmngaihna chhawm nung tura enkawlna tha zawk pe turin vawiina lokal khawmte hi ka chah duh che u a ni,” a ti bawk.
MHIP Day hmanna hunah hian hmeichhia kum 80 chin hnenah thilpek hlan a ni a, an member boralte sunna hun an hmang bawk.