Aizawl District Task Force on Covid-19 thukhawm

Aizawl District Task Force on Covid-19 chu an Chairman DC Dr Lalhriatzuali Ralte hovin nimin khan thukhawm, Aizawl District chhunga Covid dinhmun leh Vaccination te thlirho a ni.
Covid-19 hrikai thar an awm tam leh tawh thu leh Aizawl District chhunga ni 7 chhunga hrikai awmdan (7 days Incidence rate) te thlirho a ni a, District huam chhungah Mualmam chu sang berin mihring 1000 zela chhutin mi 5 in an kai ang a ni a, AMC area ah Selesih sang berin mi 1000 zelah mi 2 velin an kai anga chhut a ni bawk.
Mahni ina in test an awm thin thu leh hetianga Covid-19 hri lo kai nih inhria in report lo an awm ni a hriat a ni a, Medical facility ngeia in test a in report thlap chu duhthusam a nih thu te sawiho a ni a, hei hian nasa takin hri do letna leh invenna kawngah a puih tur thu te sawi a ni. Chutih rualin loh theihloha mahni ina in test te chu an lo positive anih chuan Task Force ah in report zel turin an duh bakah midang nena intlawhpawh lova mahni a inkhunghrang a midang kailo tura awm turin an beisei bawk a ni.
Mi tam zawkin vaccine la tawh mahsela, tar chaklo leh natna benvawn neite (high risk group) te tan hri hi a hlauhawm zual bika, thihna ala thlen reng ani tih hrereng chungin heng kawngah hian mitinte fimkhur thara invenpui tawn turin mipui te an sawm a ni. Chhungkua a high risk group nei te chuan mahni chhungkaw him theuhnan chhungkaw member tin te fimkhur lehzual turin a ngen bawk a ni.
Vaccination kalpui dan te thlirho a ni a, Aizawl District-a vaccine lakdan dinhmun chu hetiang hi a ni:““1st dose mi 3,58,312 in an la tawh a, 2nd dose mi 3,10,230 in la tawhin Precaution dose mi 25,583 in an la tawh a ni.““School ah pawh naupangte panchilhin vaccine hi pek zel ni se ti a rel a ni a, School hotute pawhin vaccine la rual naupang ten kim taka vaccine an lak theihnan ruahmanna lo siam in thahnem ngai taka hma lo a, CMO te lo tawiawm turin an ngen bawk a ni.
Puipunna leh inkhawmna hmunah Puitling zawkten naupangte aiin Mask vuah an taima lo zawk a, hri a darh huk hmaa tanlak thar a ngaih thu leh mitinten midang kan tanpui theihna chu Mask vuah that leh fai taka kutsil anih avangin tan la thar a fimkhur thar turin mitin te an ngen bawk a ni.