Lalrindika Ralte MLA 1-Hachhek AC (ST) chuan vawiin Khan PRESS STATEMENT siamin, “Tunhnai June 28, 2022 leh July 7, 2022 khan kan bial, Hachhek Constituency-a Zamuang khaw daiah Kuhva tawlhruk man a ni a. Heng dan lo a Kuhva tawlhrukte hi sorkar hnuaia dan leh thupek kengkawhtute man ni lovin, tlawmngai a duty kuthnathawktute man a ni nghe nghe.

“Sorkarin dan leh thupek a kengkawh tur a nih lai a, sorkar check gate paltlanga Kuhva tawlhruk, mi tlawmngai duty-ten an man zawk tlat hi thil kalphung tur a ni lo a. Sorkarin a tih tur a tih loh vanga hetiang thil hi thleng a ni tih hi ka ngaihdan a ni.

“Ram dang atanga dan lo a Kuhva lo lut avanga Hachhek bial mipuiten kan Kuhva tharchhuah hralhna kawnga harsatna kan tawk thin hi pawi ka ti takzet a. A chhan bulpui ber chu dan lo a Kuhva lo lut, Mizoram chhunga awm ngei pawh man duh lo sorkar kan neih vang niah ka ngai. Dan loa ram dang atanga Kuhva lo lutin a khua leh tuite tan harsatna nasa tak a siam sak tih hi Mizoram sorkar hian min hriat nawn sak se ka duh a. A rang thei ang bera Kuhva tawlhruk titawp tur leh kuthnathawktute harsatna sukiang turin Mizoram sorkar ka ngen bawk a ni.

“Tin, dan lo a Kuhva tawlhrukna ti tawp tura tlawmngai taka duty kan bial mipui, kuthnathawktute thawhrimna leh inpekna hi ka chhuang takzet a. An hmalakna hi ka thlawp tlat a ni,” a ti.