Chief Minister Zoramthanga chuan thalaite chu hlawhtlinna kawng an zawh na ah hmasawnna ti thuanawp thei ruihtheihthil laka filhim turin a chah. He thu hi Govt. Aizawl North College Freshers’ Social cum Falicitation program, Electric Veng YMA Hall-a buatsaih a hmanpui na ah a sawi a ni.
Vawiina Govt. Aizawl North College Freshers’ Social cum Falicitation program, Electric Veng YMA Hall a neih hmanpui tu Chief Minister chuan zirlai tharte lawmna leh zirlai hlawhtlinna changte lawmna hun hmanna a telpui thei chu lawmawm tiin, zirlaite chu anmahni leh an chenpuite, khawtlang leh ram tan mi chhenfakawm ni tur chuan nun uluk a, ruihhlo chi hrang hrang laka fihlim a pawimawh thu a hrilh a. Sawrkar in sum tam tak sengin ngawlvei hrang hrang enkawlna hmunhma te a ruahhman thin te, NGO, kohhran leh khawvel huap pawha sum leh tha tam tak senga ruihhlo vanga kan buaina te hi keimahni theuhin ruihhlo kan tih loh theuh mai hian buaina kan insiam lo mai zel a nih thu a sawi. Chief Minister Zoramthanga chuan tumruhna leh chhelna nei tan ngam loh a awm loh thu sawiin, mahni inthunun tur chuan tumruhna nasa tak nei turin kalkhawmte a chah a ni.
Freshers’ Social cum Falicitation program ah hian an zirlai atanga MZU rank holder pali te hnenah lawmpuina hlan niin, khuallina Chief Minister hian a hlan a ni.
Chief Minister Zoramthanga hian vawiin vek khan Govt. Aizawl College Freshers’ Social, Vanapa Hall a buatsaih a hmanpui naah zirlaite chu hun hman tangkai thiam turin a fuih.
Chief Minister chuan freshers te chu bul thar tan tur an nih angin, lehkhapuan la ziahloh thar hlakah an nun an ziak dawn a, keu let a inchhirna tlem thei ang ber an neih nan an nun uluk a, fimkhur takin hun a tha leh tangkai thei ang bera hmang turin a chah a ni. Chief Minister chuan khawvela mihringin hun kan neih zat a inang vek a, chu kan hun neih kan hman tangkai thiam dan chuan kan hma hun a hril dawn a ni tiin, hun kal tawh siamthat a lamlet chakna ringawt kan khah loh nan, tunah hian kan nun kan fimkhur a, ngaihtuahna fim nen ke pen a tul a ni, a ti a. Taimakna, tumruhna leh nun ulukna nen, hriselna leh ngaihtuahna tibuai theitu ruihhlo laka fihlim bawkin an hun hmanga, duhthlanna dik hmang turin zirlaite a chah a ni.
Programme ah hian zirlai zirna lamah leh infiamna lama tithate hnenah Academic Award leh Sport Award hlan a ni.
