Vawiin chawhnu dar 1:00 khan MPYCC huaihawtin Aizawl Tennis Court bul, Khatla-ah ‘Mipuite Thlavang Hauhna Inkhawm’ neih a ni a, Mizoram Sorkarin mi harsa tak takte Health Care bill vaibelchhe 67 chuang a bat sak te, Grape Wine an man sak boral ta Pi Lalhriatpuii (L), Dawrpui Vengthar zangnadawmna pek phutna te ; Grape Wine an man sak pe let tura phutna bakah, National Health Mission (NHM) hnuaia thawkte sorkarin a intiam ang ngeia an phutte tihlawhtling vat tura phutnate avanga he inkhawm hi huaihawt a ni.
Inkhawmah hian Zodintluanga, MLA, Treasurer MPCC chuan thu sawiin, “Congress sorkar khan MNF hun hmasaa sum dinhmun tluchhia a siamtha vek a, kan sorkarin sum tam tak kan hnutchhiah bawk. Kum li a ni dawn a, sum harsatna nasa takah MNF in min hruailut ta a, tuna kan awmdan hi a ni ta. Tunah chuan Pu Zoramthanga, sum tam zia sawi thin khan chhuanlam a siam a siam ta a, COVID 19 vangin kan harsa a ti ta chul a, Indian ram state dang COVId 19 vanga harsa sawi kan hre mumal ve mang si lo,” a ti.
CLP Leader chuan, Chief Minister berin sum a harsat thu a sawi leh tak mek laiin, Airport cute ber a buaipuia Kamrula leh ama unau fapa chuan cheng vaibelchhe tam tak man contract an thawk thei reng tih a sawi a. MNF Minister-te an ro em em laiin amah CM leh a Minister chuam erawhin thawh sen loh hna an neih thu a sawi a, “Congress sorkar lai ang lo takin MLA ten Budget kan pass pui takah khan Minister-te pawisa tur a awm lo a, salary and wages chauh kan pass a, CM kutah engkim dah a ni a, Pu Zoramthanga intih ropuina mai a ni. Kan sum dinhmun a chhe tual tual a, kan CM sum dinhmun erawh a that tual tual kan ring, tiin a sawi bawk.
“Duhamna tel lova ram hmangaihtuten sum an enkawl chuan rethei lutuk lovin a awm theih tih Pu Lalsawta khan a tilang a. CSS sum puk chawpin kan lo kal mai mai tih a chiang ta a ang hle,” Pu Zodintluanga chuan a ti a, Finance Commissioner-in sum dinhmun that loh thu a puan takah chuan Congress MLA chuan tun hun hi a ni lawm ni tuma thal theih loh a tih fo thal hun chu, tiin a sawi. “Congress sorkar laiin sorkar hnathawkten a hun takah hlawh an la a, GP Fund an mamawh angin an la thei, mi harsate an dam loh nikhuain MR bill a tang ngai lo. Tunah MR bill pek theih a ni ta lo a, hei hi CM leh Finance changtu ni bawk sum enkawl thiam loh vang a ni,” a ti bawk.
Tun sorkarah MNF sorkar hmasa ang maia dan leh thupekah an hlawhchham lailet der a ni tih Pu Zodintluanga chuan a sawi a, “An sorkar hmasaah hel leh ruihhlo a hluar a, SRS chauh ni lo Mizo Tlangval pawlte din a ni. Vawiinah sorkarin a tih tur a ti thei lo a, Home Minister pawhin SRS din a rawta hei hian sorkar mualpho zia a tichiang a ni. Heroine hi nitin hawng 50 te an man tih thawm a ri reng a, khawlai a him leh tawh lo a ni,” a ti. MNF sorkarin a tih ber chu Congress lo siam sa hming thlak ; ZMC tih te, Republic-a Auditorium Aizawl Stadium an tihte chu a ni mai tih a sawi a. Hming thlak hian an hun an hmang tawp dawn a ni, tiin a sawi.
“Kan voters thalai ten ngaihtuah se, tu hi nge kan leader atana kan duh tih hi. Mi tam takin Pu Lalsawta kaihhruai hnuaia awm hi an chak a, leader tha hnuaiah lo chuan a that theih loh tih pawh MNF MLA fel tak tak turte hian a tilang chiang a, an tha thei lo. Sum enkawl thiam, eirukna laka fihlim, mi tha Pu Lalsawta kan nei a, Zoram mipuite pawhin min lo tawmpui ve rawh u,” Pu Zodintluanga, MLA chuan a ti.
Pu John Siamkunga, Ex-MLA, G/S MPCC pawhin thusawiin, “Dam lohna avanga Hospital pan, damlo bill la thei si lo chhungkaw sing chuangin ke min penchhuahtir a ni. An bat hi pe thuai turin kan phut, rule of law hi he sorkarah hian a awm lo a ni,” a ti.““Pu Rosiamngheta, Councillor AMC, MPCC Secretary pawhin, “Thusawi thiam kan mamawh lo a, management thiam kan ramin kan mamawh ta zawk a ni. Sorkar tha kan mamawh a, sorkar thaah chuan mipui kan damtlang a, tunah chuan Kamrula lo chu kan damtlang si lo,” a ti bawk.
Pu Vanlalzuiliana, President ADCC, chuan “Chan loh khana chhuak sorkar kan nei hi a vanduaithlak hle a ni, Mizoram hian sorkar tha kan mamawh takzet a, tun sorkar hi thalaite tan a vanduaithlak hle a ni,” tiin a sawi.
Dr. Lalmalsawma, President, MPYCC, pawhin thu sawiin, “Party Office-a langsar taka Mizo Hnam Run tih tartuten langsar takin Mizoram mipuite min run mek a ni. Mimal dikna chanvo humhalh a ngai ta a, Health Care thlengin lak theih a ni ta lo,” a ti a.
RESOLUTION
Vawiin July ni 22, 2022 (Zirtawpni)-a Aizawl Tennis Court kawta MPYCC huaihawta ‘Mipuite Thlavang Hauhna Inkhawm’ huaihawta pungkhawmte chuan a hnuaia mi ang hian ‘Resolution’ siamin kan pawm tlang a ni.
1. Mizoram Sorkarin damlo Healthcare bill cheng vaibelchhe 67 chuang a la bat hi July ni 20, 2022 hmaa pe vek tura kan phutnaah hmalak zuina engmah a awm loh avangin, damlote bill pekchhuah a nih theihna turin hma kan la zel dawn a ni tih Mizoram Sorkar kan hriattir nawn leh a, Sorkarin damlo-te bill a bat sak hi chhuanlam siam lova a rang lama pe fel nghal turin kan phut nawn leh a ni. MPYCC-in June ni 20, 2022-a Chief Minister hnena lehkha a thehluha Point panga (5) kan tarlante chu Sorkarin mipuia puangzara tihlawhtling turin kan phut nawn leh bawk.
2. Grape Wine thahnem tawk tak an man sak, MPYCC-in July ni 13, 2022 chhun dar 12:00 hma ngeia Mizoram Sorkarin Pi Lalhriatpuii (L) chhungte hnenah zangnadawmna cheng nuai 100 pe tura kan phutnaah hmalak a la ni lo leh Grape Wine zawrh lai an mansak pek let an la nih loh avangin a tul angin hma kan
la zel dawn a. Champhai leh a chhehvel khuaa Grape chingtute harsatna su kianga an chungthu rel fel vat tur leh MLP Act 2019 leh MLP Rules a pawm danah thutlukna chiang taka puangzar vat turin kan phut.
3. July ni 17, 2022-a Sokarin National Health Mission (NHM) hnuaia thawkte thil phutah hmalak nghal a nih tur thu an sawi hi chhuanlam dang siam lova rang taka tih hlawhtlin ni rawh se.
4. Congress Sorkarah khan mirethei zawkten Healthcare a takin an chhawr tangkai a, bill tang a awm ve ngai lo. Sum leh pai enkawl thiam loh vanga cheng vaibelchhe tam tak leiba a tlingkhawm ta hi pawi kan ti a. Healthcare chauh ni lo, Sorkar hnathawk ‘pension’ lak theih loh leh ‘GP Fund’ lak theih loh t
e, a hun taka hlawh lak mumal theih lohte bakah, ‘contract’ hnathawktuten bill an la mumal thei tawh lo a ; Mizoram Sorkar hi sum leh pai enkawlah a hlawhchham a ni, harsatna lian tak kan tawng mek a, aia harsatna lian zawk kan la tuar zel dawn bawk. Sum enkawl thiam loh vanga leiba tam tak laka Mizor
am harsatna nuaibo tur leh Mizoram sum dinhmun siam tha leh turin thusawi aia hnathawha lantir thin, mi dik leh rinawm Pu Lalsawta Mizoram mipuiin kan mamawh a ni.
