White paper tih chhuak tur duh chhan sawi

MNF sawrkar hnuaiah Reserve Bank of India pawn atangin leiba cheng vaibelchhe 3000 chuang puk belh a nih tawh avangin mipui phur a rit chho mek a, ram sum dinhmun diktak mipuiin an hriat theih nan sawrkarin sawifiah turin an phut tih Congress president Lalsawta chuan a sawi.
Zirtawpnia Congress Bhavan-a political session-ah MPCC president hian an party-in ‘White Paper’ tichhuak tura sawrkar an phut chhan sawiin, “Health care, pensions, GP Fund leh sawrkara contract hnathawkten rei tak chhung an hmuh tur ang an hmuh theih loh avangin Mizoram sawrkar hian sum dinhmun hi mipui hriatah puang se kan tih vangin ‘White Paper’ kan ngiat a ni. Assembly Session zawhna chhanna atanga kan hriat danin, MNF sawrkar hian RBI pawn atangin January 2022 thleng khan cheng nuai 3,26,465 (vbch 3264.65) leiba a puk belh tawh a. Leibat hnem vangin mipui phur a rit chho mek zel niin kan hria a. Chuvangin, ram sum leh pai dinhmun diktak hi mipuiin hria se kan duh a ni,” a ti.
MNF sawrkar tirh, kum 2019 atang khan sawrkar leiba hi cheng nuai tam takin a pung chho a. Hmasawnna liantham leh sum hmuhletna (infrastructure investment) hmuh tur awm si loin, duhsak zawngte vur nan sum an hmang chiam nia an hriat vangin ‘White Paper’ hi tichhuak ngei se an duh tih finance minister hlui Lalsawt hian a sawi nawn a. “Sawrkar laipuiin July 20-a Mizoram sawrkar chu centrally sponsored scheme (CSS) sum zawng zawng anmahni department account-a dah lut vek tura a tih avanga sum harsa tura sawrkarin a sawi hi, heng CSS sumte hi a hman lohna tur, revenue expenditure-ah an lo hmang tam tih a hriat theih a; kalphung pangngaia sum dah tur a nih tak avanga sum lama harsatna a zualkai tur chhan hi mipui hriata sawifiah tura kan duh vang a ni bawk,” a ti.